لادانا زێبارى و پلانا دوژمنكاریانه
وهرگرتنا باوهریێ ژ هشیار زێبارى وهزیرێ دارایى یێ حكوومهتا عیراقێ، ل دووماهى سهرهدانا مالكى بۆ باژێرێ سلێمانیێ پلان بۆ هاتبوو دانان و سیناریۆیا پلانێ ژى ههر ژلایێ مالكى ب خوه ڤه هاتبوو نڤیسین و ئهكتهرێن وێ ژى پهرلهمانتهرێن لیستا گۆڕان بوون، ههروهسا هندهك پهرلهمانتهرێن دى ژى ژ كورد و عهرهبان رۆل د وێ زنجیرێ دا ههبوون، لێ ئهكتهرێن سهرهكى پهرلهمانتهرێن گۆڕان بوون، چونكو دهمێ باوهرى ژ زێبارى هاتیه وهرگرتن وان پیرۆزباهى ل ههڤدو دكرن ئهز یێ پشت راستم ئهو زنجیره دێ یا بهردهوام بیت و رۆژهك دێ هێت ههر ل وى پهرلهمانى ئهندامێن وان ژى دێ هێنه گازیكرن و كهڤنه بهر وێ لێپرسینێ و ههكه بێژین بۆچى هشیار زێبارى؟ بێگۆمان ژبهر وێ چهندێ یه كو زێبارى دبلۆماتكار و كهسایهتیهكێ بهێزه ل سهر ئاستێ عیراقێ ههموویێ و دهمێ وهزیرێ دهرڤه یێ عیراقێ بۆ ههموویان سهلماندن ئهو یێ بۆ عیراقهكا بهێز و ئێكگرتى كار دكهت، ههروهسا دهمێ پۆستێ وهزارهتا داریى ژى وهرگرتى ب ههمان گیان و بێ فهرق و جوداهى بۆ ههموو پارێزگههێن عیراقێ كار دكر و سهنگا خوه د ناڤ حكوومهتا عیراقێ ههبوو، ههتا ل دهف (حهیدهر عهبادى) سهرۆك وهزیر ژى، ژ بهر هندێ مالكى و داردهستێن وى چاڤ پێ نهدرابوون و ئهو پلان بۆ دانا و مهرهما مالكى ژ لادانا زێبارى ئهوه دا سهنگا حكوومهتا عهبادى لاواز بكهت، چونكو ژمێژه مالكى ب سپۆنسهریا وهلاتهكێ جیران و ب پشتهڤانیا هندهك حزب و لیستێن سیاسى یێن عیراقێ یێ بهڕكێ ژبن پێن عهبادى دكێشن و مهرهما وى ئهوه عهبادى ژى لابدهت و جارهكا دى ئهو ببیته سهرۆك وهزیرێن عیراقێ، و یا من دڤێت ل ڤێره بێژم لادانا زێبارى پلانهكا دوژمنكارى بوو و خزمهتا عیراقا ئێكگرتى ناكهت و ئهو كهسێن پلان بۆ زێبارى دارشتین وان یاریێن ب ئاگرى كرین، و دیرۆك دێ وان شهرمزار كهت، و هیڤیا من ئهوه ئهڤ چهنده دووباره نهبیتهڤه و ههموو لیستێن كوردى ل پهرلهمانێ عیراقێ ئێك دهست و ئێك دهنگ بن و ههموو بزاڤێن خوه بدهنه كارى ئێكرێزیا ناڤمالا كوردى ب پارێزن دا ئێدى كهیفا دوژمن و نهحهزان ب مه نههێت.
