لاندكه داربەست
پرلمان سەبری مەسیحا
ئاوازەک کو مرنێ ل پشت خوە بڤەشێرە
ژ گەفان قەد نا ترسە
تابلۆیەک ب خوینێ هاتبیتە کێشان
ژ برینان نا ترسە..
سترانەک بۆ شاهیان ڤەهاند بیت،
دایکەک ل رۆژا مرنا کوڕێ خوە ببێژیت
ژ ئەگەران نە پرسە..
خوەزی بارانا ئەڤرۆ ببا تیر، و
ب جەرکێ زالمان بکەڤێ
دا گڕنژین ئاهنگان گێڕن و
خەم ژی کەڤنە رەڤێ..
لاندکێن…
هەکە دەنگێ تلیلیان ل چیا بلند بوو
ئاها هینگی ژ خوە بترسە..
هەی لێ لێ، هەی لۆ لۆ، تارییا شەڤێ..
ل ئاسمانێ بێدەنگی و هشیاری یا ئەڤێ خەوێ
زارۆک جاران داربەستێن وەغەرەکا بێ ڤەگەڕن..
بووکێن مە بێ زاڤا،
ب جلێن رەش رویێن وان ژ رۆندکان دتەڕن..
شاهیێن مە ب تڤەنگان ئاهەنگان دگێڕن
ل بن سەرێ مە ژی
ل شوونا پەمبی بالیفکێن مە بەرن..
تەیرێن مە ژی
ل بلنداهییان دفڕن نە بینە دبێ پەڕن..
زارۆکێن مە بێ پێ لسەر دەستان
هندەک ژی هێشتا مێژمێژۆک د دەڤی دا رادپەڕن..
هەکەرهوین مێرێن مەیدانێ نە،
کچێن مە ل نێچیرەکا وەک وە دگەڕن..
دێ بنە نێچیرا تفەنگا وان
خوە ئەگەر هوین ب فرۆکە و
چەکێ مەزن بخوڕن..
هەی لێ لێ، هەی لۆ لۆ،
تاڤ و گەرما رۆژێ
ل ئاسمانێ بلند نا کەڤتە ناڤ تۆزێ
خۆزی ببایە بایێ بیابانێ
ل دوژمنی وەک باهۆزێ
هەر چار ئالی مە گرێدابان
وەکی دەزی،
هەمی ئالی تێک ب ئالۆزێ.
