لاوازترین هەلبژارتن د دیرۆکا کۆمارا ئیسلامی یا ئیرانێ دا هاتنە کرن
هەرچەندە دەزگەهێن راگەهاندنا ئیرانێ دیار دکەن رێژەیا پشکداریا هەلبژارتنان ٤١٪ بوویە، لێ چاڤدێرێن سیاسی و سازیێن جڤاکێ سڤیل دیار دکەن، رێژەیا پشکداریا هەلبژارتنان ١٠٪ بوویە و ل تەهرانێ و باژێرێن رۆژهەلاتێ کوردستانێ ژی رێژەیا پشکداریا خەلکی ٥٪ بوویە.
دەزگەهێن راگەهاندنا ئیرانێ دیار کرن، رێژەیا پشکداریا وەلاتیان د هەلبژارتنێن پەرلەمانی ل ئیرانێ دا ٤١٪ بوویە، هەلبژارتن ب رەنگەکێ باش برێڤە چووینە و چو ئاریشە ژی دروست نەبووینە.
چاڤدێرێن سیاسی ل ئیرانێ و رۆژهەلاتێ کوردستانێ دیار دکەن، رێژەیا پشکداریا خەلکی د هەلبژارتنان دا ب گشتی ١٠٪ بوویە و ب تایبەتی ل باژێرەکێ مەزن یێ وەکو تەهرانێ رێژەیا هەلبژارتنان ٥٪ بوویە و خەلک نەچووینە سەر سندوقێن دەنگدانێ، چونکی بەری نها خەلکی ب رێیا شورەشا ژینا نەرازیبوونا خوە ل هەمبەر دەستهەلاتێ دیار کرینە و ب رێیا ڤان هەلبژارتنان جارەکا دی وەلاتیێن ئیرانێ ئەڤ پەیامە دان، کو ئەو ڤێ دەستهەلاتێ قەبوول ناکەن.
هندەک ژ دەزگەهێن راگەهاندنا ئیرانێ دیار کرینە کو محەمەد خاتەمی سەرۆک کۆمارێ بەرێ یێ ئیرانێ ژی وەکو نەرازیبوونەک ل هەمبەر رەوشا خراب یا ژیانا وەلاتیان، پشکداری د هەلبژارتنان دا نەکریە.
چاڤدێرێن سیاسی ل رۆژهەلاتێ کوردستانێ ژی دیار دکەن، ل رۆژهەلاتێ کوردستانێ ب گشتی رێژەیا پشکداریا وەلاتیان گەلەک کێم بوویە و رێژە د ناڤبەرا ٥ هەتا ٨٪ بوویە و ل هندەک باژێرێن رێژەیا پشکداریا خەلکی کێمتر ژ ٥٪ ژی بوویە، چونکی ئێدی باوەریا خەلکی ب هەلبژارتنان نەمایە و خەلک باش دزانن ب ڤان هەلبژارتنان چو گوهۆڕین دروست نابن، ب تایبەتی ژی نها خەلک د رەوشەکا گەلەک خراب یا ئابووری دانە و وەلاتی باش دزانن هەلبژارتنێن پەرلەمانی چو کاریگەریێ ل ژیانا وان ناکەت و ئەو ژ هەلبژارتنان بێ هێڤی بووینە و ژ بەر ڤێ یەکێ ژی خەلک نەچوونە سەر سندوقێن دەنگدانێ.
ل گۆر باوەریا چاڤدێرێن سیاسی هەلبژارتنێن ڤێجارێ لاوازترین هەلبژارتن د دیرۆکا کۆمارا ئیسلامی یا ئیرانێ بووینە، چونکی رەوشا ئابووری یا خەلکی گەلەک خرابە، ژ بۆ خەلکێ ئیرانێ ب گشتی و ژ بۆ خەلکێ کورد ژی ب تایبەتی گەلەک ئاشکرایە کو دەستهەلاتا نها یا ئیرانێ چو پرۆژە بۆ باشکرنا ژیانا وان نینە، ژ بەر ڤێ یەکێ ژی سۆزێن کو بەربژارێن ڤێجارێ دانە خەلکی گەلەک ژ راستیا رەوشا نها دوور بوون، ژ بەر ڤێ یەکێ ژی خەلک نەچوونە سەر سندوقێن دەنگدانێ، هەلبژارتنێن ڤێ خۆلا پەرلەمانێی ل ئیرانێ د هەوەکا گەلەک سار دا دەرباز بوو و لاوازترین هەلبژارتن بوو د دیرۆکا کۆمارا ئیسلامی یا ئیرانێ دا.
