لاوازیا رهفتارێن سیاسی، پارتێن باشوور وهك نموونه
زور جاران دهمێ مروڤ ل هندهك ههلویست و رهفتارێن پارتێن سیاسی ل باشورێ كوردستانێ دنێریت ئێكسهر مروڤ ههست ب لاوازیا هزركرنێ و چاوانیا سیاسهتكرنێ ل سهر بنهمایێ لوژیكێ سیاسی دكهت، چونكه ل باشور ههتا نها سیاسهتكرن ل سهر بنهمایێ هێزێ ب رێڤه دچیت. یێ بهێز دشێته یێ لاواز و یێ لاواز چ ژێ ناهێت و ئهڤ چهنده ژی ژ ئهنجامێ نهبوونا باوهریێ یه ب بنهمایێن دیموكراسیهتێ و دهستا و دهستكرنا دهستههلاتێ و ههتا نها هند ژ پارتێن باشور بكارئینانا هێزێ د ئێك لاكرنا هند ژ كێشێن ناڤخویی دا ب مافێ خو دزانن و ب مافێ خو یێ وهرگرتنا شهرعییهتێ ژ شورهشێ وهردگرن! بێ گومان ئهڤ چهنده ئێكسهر دبیته ئهگهرێ لاوازكرنا دام و دهزگایێن شهرعی و بێ رێزكرنا بنهمایێن دیموكراتیهتێ ئانكو بێژین دیموكراتییهت ل باشور بتنێ دروشمن و د ناڤهروكا خودا گومانهكا مهزن پهیدا دكهت! ل باشور سیاسهت ل سهر بنهمایێ هزری و هزركرن د پروژهیێن سیاسی یێن ستراتیژی دا ب رێڤه ناچیت بهلكو بتنێ سیاسهت وهكو سیاسهتا روژێ ب رێڤه دچیت ئانكو (سلاڤ ل گاڤێ یه) یه و ئهڤ جورێ سیاسهتكرنێ ژی ههردهم مهترسی ل پهی پهیدا دبن چونكی ڤی جورێ سیاسهتێ بهردهوام ترس ژدهست دانا دهستههلاتێ وجهماوهری یا ههی لهوما ب ڤی رهنگی ئارامی و ركابهریا سیاسی دروست نابیت و سهر ئهنجام پروسێسا دیموكراسی دكهڤیته د مهترسیێ دا و زهرهرمهندێن ئێكێ ژی جهماوهر و خهلكێ كوردستانێ یه، دیسان ژلایهكێ دیڤه مروڤ چ جیاوازیێن مهزن دناڤبهرا پارتێن سیاسی یێن باشور دا نابینیت ژلایێ ناڤهروك و رهفتار وهزر و ئایدولوژی ڤه ب رهنگهكی ژ پارتهكێ بو پارتهكا دی بتنێ جیاوازی د رهنگێ ئالای و ناڤێ پارتێ وناڤێ سهروكێ پارتێ دایه! ب ڤی شێوازێ نها بیت نه سیاسهت سیاسهته و نهژی دیموكراسی دیموكراسیهته و ئهنجامێن وێژی وێ ب خرابی دهركهڤن ههر دنها دا ئهم دبینین!
ئهگهر بنێرین ل سهر ئاستێ مهدیایێ دا ژی ههر پارتهك ههول ددهت ههول وخهباتا لایهنێ بهرامبهر خراب نیشان بدهت بێی كو ئهو تشتهك یان پلان و بهرنامهكێ جوان و جوانتر نیشان بدهت و ئهڤ چهنده ژی ل باشور بویه كهلتور (كهلتورێ ههڤ دوو شكاندنێ) ئهگهر شونا ڤی كهلتورێ مهترسیدار بهرنامه و پلان و ستراتیژیهتا نهتهوهیی و هزری و ئابوری ههبیت من باوهره دێ ئهنجامێن ههرهباش ههبن ژ بو گهل و وهلاتی، د نها دا ل باشور زور ب ساناهی یه هێز جهێ ههر تشتی بگریت و دیسان ژی روناهییهك ژی نینه كو مروڤی ئومێدهكا مهزن پێ بكهت و تهڤ پرسێن خهتهرناكێن ڤی وهلاتی چارهسهر ببن لهوما سیاسهت ل باشور پێتڤی ب خودا چونهكا تهمام دایه و دڤێت ژ دروشمێن بریقهدار دوركهڤن و بلا سیاسهت وسیاسهتكرن رێكا خو یا دروست بگریت و كارو خهبات ژ بو تهڤ چینێن جڤاكی بن ژلایێ دروستكرنا تاكێ كورد و وهلاتهكێ كوردی چونكی د نها دا ئهڤ چهنده كهتی یه د گومانهكا مهزن و مهترسیدار دا.
