لاوێن زاخۆ شه‌ڕی بۆ رێزێن پێشیێ دكه‌ن
عەلی حاجی:
د داخویانیەکێ دا راهێنەرێ تیما لاوێن یانه‌یا زاخۆ ئەوا پشکدار د خولا نایابا ئیراقێ یا فوتبۆلێ ل سەر ئاستێ لاوان بۆ رۆژنامەیا ئەڤرۆ دیار کر تیما وان دەربازبوونا خوه بۆ چارگوشا زێرین مسوگەر کریە و زاخۆ کانیکا یاریزانایە.
زێدەتر تاهر حەمدی یێ ناسیار ب نیهاد شەلهوب گۆت: پشتی بورینا شەش گەڕا ژ خولا نایابا لاوێن ئیراقێ، تیم د رەوشەکا گەلەک خراب دا بوو ژ سەرجەمێ شەش یاریان بتنێ سەرکەڤتنەک هەبوو، دگەل وەرگرتنا ئەرکێ ڕاهێنەراتیا لاوێن زاخۆ مە شیا روحیەتەکا باش ژ بۆ سەرکەڤتنێ دناڤ یاریزانان دا پەیدا بکەین و مە شیا چار سەرکەڤتنا و وەکهەڤیەکێ تومار بکەین و دەربازبوونا خوە د کوما خوە دا به‌ری ب دووماهی هاتنا وێ ب گەرەکێ ب دووماهی بینن، هەرچەندە ل سەر ئاستێ یاریزانان من نەشیا چو گوهۆرینان بکەم لێ من شیا ئاستێ دەروونێ یاریزانان باشتر بکەم و پێشتر ژی من ڕاهێنەراتیا ڤان یاریزانان کربوو و من شیانێن وان باش دزانینن، ل ڤێ ئەینیێ یاریا مە بەرامبەر لاوێن نەورۆزە و دبیت دەلیڤەیێ بدەمە یاریزانێن یەدەک دا کو شیانێن خوە دیار بکەن لێ هەر دێ بۆ سەرکەڤتنێ یاریێ کەین ژبەرکو یاریێن چوویی ب ئارمانجا تولڤەکرنێ و سەرکەڤتنێ مە یاری دکر و پلانا مە ١٠٠٪ ژی هاتە بجهئینان.
ناڤبری گۆت ژی: تیمێن ب هێز د خولێ دا هەنە لێ چار گوشا زێرین دا دێ پتر خوە ماندی کەین پێخەمەتی هندێ بشێن رێزێن ئێکێ هەتا سیێ ب دەستخوەڤە بینن و تیما مە ئەو شیان هەنە بشێن وێ چەندێ ئەنجام بدەن.
ل دوماهیێ گۆت ژی: هەرچەندە دەستەیا کارگێریا یانەیا زاخۆ یا وەرزشی تەخسیری د پشتەڤانیکرنا تیمێ دا نەکریە لێ مە پێدڤی ب پشتەڤانیەکا زێدەتر هەیە دا کو بەردەوامیێ بدەنە ئاست و ئەنجامان و ئەوا پێدڤی ل سەر مە و یاریزانان یێ پێشکێش دکەین.