لسه‌ر ده‌مێ چێکری ده‌ستكرد.. نڤیسین بۆ چیه؟
عبدولخالق سولتان
دبیت كریارا نڤیسینێ ل ده‌ڤ نڤیسه‌ری وه‌كی گریێ یه ل ده‌ڤ زارۆكێن ساڤا، ئانكو شێوازه‌كێ ده‌ربڕینێ یه، نڤیسه‌ر په‌نایێ دبه‌ته به‌ر دا ده‌ربڕینێ ژ هه‌سته‌كی بكه‌ت، ئه‌و هه‌سته یێ ئارم وخۆش بیت یان یێ زڤر وته‌عل بیت، له‌ورا نڤیسه‌ر هه‌ه‌می هه‌و‌لان دده‌ت داكو وه‌كی خۆ بمینیت، ده‌ربڕینه‌كا راست و دروست ژ ئه‌وی هه‌ستی بكه‌ت، ئه‌وێ د ناخێ وی دا هاتیه ئازراندن، مینا ئه‌وی زارۆكێ ساڤا ئه‌وێ ب گریێ دبێژیته دایكا خۆ ئه‌ز یێ برسیمه، یان ژی من دڤێت بنڤم.
هنده‌ك جاران كریارا نڤیسینێ ل ده‌ف هنده‌ك نڤیسه‌ران ببیته به‌له‌مه‌ك ولێسواربن تا ب گه‌هنه ئالیێ دی یێ رویباری، ئه‌ڤ جۆرێ نڤیسینێ، تنێ گرێدای حه‌ز و هزر و بیرێن نڤیسه‌ری یه، دبیت د قالبه‌كێ پری دلینی و هه‌ست و سۆز دا بێته دارشتن، به‌لێ مه‌ره‌ما نڤیسه‌ری ئه‌وه یا ل پشت رێزكان وپه‌یڤان هاتیه ڤه‌شارتن، ئه‌و ژی هنده‌ك ئارمانجێن ده‌ستنیشانكری ب ده‌ستخۆڤه بینیت، دئه‌ڤی جۆرێ نڤیسینێ دا نڤیسه‌ر دبیته به‌رژه‌وه‌ند په‌رێس، ژبه‌ركو ئه‌و كریارا نڤیسینێ دبینیت ئامرازه‌ك و ئالاڤه‌ك بۆ ب ده‌ستڤه‌ئینانا هنده‌ك مه‌ره‌مێن كه‌سۆكی یێن به‌رته‌نگ.
لێ جۆره‌كێ نڤیسه‌ران هزردكه‌ن كریارا نڤیسینێ باشترین رێكه بۆ به‌لاڤكرنا بیرۆكه‌كا سیاسی یان دیتنه‌كا كۆمه‌لایه‌تی یان تیۆره‌كا ئابۆری یان هزره‌كا ئاینی، ئه‌ڤه جۆره نڤیسه‌ره دبینن نڤیسین وه‌كی بلویلوكێ یه، وهه‌ر ده‌مێ ئه‌وان ئاواز پێ لێدان كه‌سانێن ده‌وروبه‌رێن وان ئێكسه‌ر باوه‌ریێ پێ دئینن، و دشێن ب رێكا ئه‌وان گۆتارێن دنڤیسن، سه‌دان و هزاران كه‌سان ل دۆر خۆ بجه‌مینن، ژبه‌ركو ئه‌و تنێ ئالیێ عه‌قلی وهزری د كریارا نڤیسینێ دا بكاردئینن، دبینن نڤیسین تنێ ئامیره‌كه وه‌كی گه‌له‌ك ئامیرێن دی، كو د شێن پێ كۆنترۆلێ لسه‌ر مرۆڤان بكه‌ن، و هزر و بیرێن وان به‌ره‌ڤ هنده‌ك سه‌مت و كوژیێن ده‌ستنیشانكری ببه‌ن، ئانكو خزمه‌تا ئایدولۆژیه‌كا دیاركری دكه‌ن، د ئه‌ڤی جۆرێ نڤیسینێ دا، نڤیسه‌ر تنێ د بیته ئالاڤه‌ك د ده‌ستێ هنده‌ك كه‌سانێن دی دا، له‌ورا نامینیت خودان بریار د نڤیسینێن خۆ دا، به‌لكو ب رۆلێ ڤه‌گوهاستنێ رادبیت، وگه‌له‌ك جاران ژی دئه‌ڤان نڤیسینان دا، نڤیسه‌ری باوه‌ری ب نڤیسین خۆ نینه، به‌لێ ژ نه‌چاری دنڤیسیت.
ئه‌ڤجا گه‌له‌ك جاران پرسیار دهێته‌كرن چ جێوازی دناڤبه‌را ئه‌وان نڤیسینان دا هه‌یه ئه‌وێن نڤیسه‌ر ب ده‌ستێ خو دنڤیسین، و ئه‌و گۆتار و نڤیسینێن برێكا ژیریا ده‌ستكرد دهێنه نڤیسین، ئه‌ڤێن مه ل سه‌ری گۆتین، جێوازیه‌كا ته‌مام به‌رچاڤ دكه‌ن، دیاردكه‌ن كریارا نڤیسینێ د هه‌می ره‌وشان دا ژ ناخ و وژدانا مرۆڤی ده‌ستپێدكه‌ت، له‌ورا جار ده‌ربڕینه ژهه‌سته‌كی، جار بۆ ب ده‌ستڤه‌ئینان مه‌ره‌مێن كه‌ساتی یه، جار ژی دا خزمه‌تا هزره‌كا دیاركری بكت.
دبیت ژیریا ده‌ستكرد تا رادده‌یه‌كی ب شێت ده‌ربڕینێ ژ هه‌ردو جۆرێن دوماهیێ بكه‌ت، لێ گه‌له‌ك یا ب زه‌حمه‌ته ده‌ربڕینێ ژ ئه‌وان هه‌ستان بكه‌ت ئه‌وێن د ناخێ نڤیسه‌ری دا دهێنه ئازراندن.
