لسه‌ر گه‌ڤێن راوه‌ستاندنا چالاكیان یاری دێ هێته كرن
ئه‌ڤرۆ، زنار زوبیر:
دهێته چاڤه‌ڕێكرن ئه‌ڤرۆ تیما باسكت بۆلا یانا زاخۆ مێڤانداریا یانا دهۆكێ بكه‌ت د یاریه‌كا ڤه‌بڕ دا یا ڤاڤارتنێن پارێزگه‌ها دهۆكێ بۆ قاره‌مانیا ئیراقێ ل سه‌ر ئاستێ لاوان ئه‌وا دێ هه‌ڤڕكیێن وێ ل هه‌شتێ ڤێ هه‌یڤێ ب پشكداریا 19 یانێن پارێزگه‌هان هێنه ئه‌نجامدان.
د داخویانیه‌كێدا خالد نه‌جم سكرتێرێ ئێكه‌تیا باسكت بۆلا ئیراقێ بۆ رۆژناما ئه‌ڤرۆ گوت: لدویڤ بڕیارێن ئێكه‌تیا باسكت بۆلا ئیراقێ دڤێت هه‌ر پارێزگه‌هه‌ك ڤاڤارتنێن ڤه‌بڕ بۆ قاره‌مانیا لاوان ئه‌نجام بده‌ن ئه‌گه‌ر به‌روڤاژی دێ لدویڤ یاسایێ كارێ هه‌ر ئێكه‌تیه‌كا نه پێگیر هێته راوه‌ستاندن و به‌رپرس بیت ل سه‌ر هه‌ر سزایه‌كێ، ئه‌ڤچه‌نده ژی پێخه‌مه‌ت هه‌بوونا هه‌ڤڕكیێ و ده‌لیڤه‌دان بۆ پرانیا یانێن پارێزگه‌هێ كو بشێن پشكداریێ بكه‌ن.
ژلایه‌كێ دیڤه ناڤهاتی دیاركر كو ئه‌ڤ قاره‌مانیه دێ بیته ده‌رگه‌ه بۆ ژێگرتنا باشترین یاریزانێن پشكدار بۆ ناڤ رێزێن هه‌لبژارتیێ ئیراقێ كو بڕیاره پشكداری قاره‌مانیێن عه‌ربی و ئاسیایی بكه‌ن، له‌ورا پێشبینیێ دكه‌م دێ هه‌ڤڕكیه‌كا بهێز هێته كرن.
