لقێ 18 یێ پارتی ئاهه‌نگا دانه‌نیاسینا به‌ربژارێ خوه ساز كر
ئامێدیێ، محمود نهێلی:
ب ئاماده‌بوونا لژنه‌یا بلندا هه‌وا هه‌لبژارتنان و هه‌ژماره‌كا به‌رپرسێن سه‌ركردایه‌تیا پارتی و ئه‌ندام په‌رله‌مانێن كوردستانێ و جڤاتا پارێزگه‌ها دهۆكێ و به‌رپرسێن حزبی و حكومی و جه‌ماوه‌ره‌كێ زۆرێ ده‌ڤه‌رێ ئاهه‌نگا دانه‌نیاسینا به‌ربژارێ پارتی دیموكراتی كوردستان بۆ جڤاتا نوونه‌رێن عیراقێ هاته ساز كرن.
عومه‌ر ئوره‌ی، به‌رپرسێ لقێ 18 یێ پارتی دیموكراتی كوردستان د ڤێ ئاهه‌نگێ دا په‌یڤه‌ك پێشكێش كر و گۆت: “د كاودانه‌كێ دژوارێ ئابووری و سیاسی و له‌شكری دا ل ده‌ڤه‌را مه جاره‌كا دی ئه‌م دێ كه‌ڤینه به‌رامبه‌ر به‌رپرسیاره‌تیه‌كا دیرۆكی و گه‌له‌ك گرنگ بۆ به‌رده‌وامیدان ب درێژه‌پێدانا خه‌باتا كوردایه‌تیێ و بلند راگرتنا ئالایێ كوردستانێ ب سه‌ركێشیا سه‌رۆك مه‌سعود بارزانی”.
عومه‌ر ئوره‌ی گۆتژی: “ئه‌م نوكه یێ د پێگه‌هه‌كێ گه‌له‌ك ب هێز دا پێنگاڤێن خوه دهاڤێژین و به‌ر ب هه‌لبژارتنێن په‌رله‌مانێ عیراقێ دچین، پارتی د هه‌لبژارتنێن خولا بۆری یێن په‌رله‌مانێ عیراقێ دا هێزا ئێكێ ل سه‌ر ئاستێ هه‌موو عیراقێ ب ده‌سخوه‌ڤه ئینا، ڤێجارێ ژی ب پشته‌ڤانیا جه‌ماوه‌رێ دلسۆزێ پارتی هه‌ر دێ بینه هێزا ئێكێ”.
به‌رپرسێ لقێ 18 یێ پارتی دیار ژی كر، كا چاوا پێشمه‌رگه شیا داستانا پردێ و سحێلا تۆمار بكه‌ت وه‌سا جه‌ماوه‌رێ پارتی ژی هه‌ر د هه‌مان سالا 2018 دا شیا داستانا سه‌ركه‌فتنێن مه‌زن د هه‌لبژارتنان دا تۆمار بكه‌ت و گۆت: “به‌ربژارێ مه خالد سه‌لیم یێ هه‌ژماره 27 به‌ربژارێ هه‌موو گوند و پێكهاتێن ده‌ڤه‌رێ یه بێ جوداهی، له‌و پێدڤیه ئه‌م هه‌موو پێكڤه پشته‌ڤانیێ لێ بكه‌ین”.
