لقێ ١٨ یێ پارتی پڕۆژەیەكێ خێرخوازی بۆ مەها ڕەمەزانێ راگەهاند
ئامێدیێ، مەحمود نهێلی:
ل دووڤ بەرنامەكێ بەرفرەه و پێشوەخت دارشتی ژ لایێ لقێ ١٨ یێ پارتی ڤە ب هەڤكاری ل گەل دەڤەرداریا ئامێدیێ و لایەنێن پەیوەندیدار بۆ مەها رەمەزانێ.
د ئێكەم پێنگاڤ دا بەرەڤان حەمدی، بەرپرسێ لقێ ١٨ یێ پارتی ب بەرهەڤبوونا وارشین سەلمان، دەڤەردارێ ئامێدیێ و د. ئیبراهیم حەسەن، ڕێڤەبەرێ ساخلەمیا ئامێدیێ، د كۆنگرەكێ ڕوژنامەڤانی دا، پڕۆژەكێ خێرخوازی یێ تایبەت ب داشكاندنەكا مەزن د خزمەتێن جودا یێن ساخلەمیێ دا ل كەرتێ تایبەت راگەهاند.
بەرپرسێ لقێ 18 زێدەباری پیرۆزباهیا مەها رەمەزانێ، سوپاسی و دەستخوەشی ئاراستەی هەموو نۆشدار و خودان پیشەیێن ساخلەمیێ كرن یێن پشكدار د ڤی پڕۆژەیێ خێرخوازی دا.
بەرپرسێ لقێ زێدەتر گۆت: «١٦ نۆشداران بڕیار دایە بهایێ پلێتێن چوونا ژۆر ب ڕێژەیا 33% كێم بكەن، ئانكو ژ ١٥ هزار دیناران بكەنە ١٠ هزار دینار، ١٧ دەرمانخانان ژی بڕیار دایە داشكاندنێ ب رێژەیا 25% بێخنە سەر سەرجەمێ بهایێ هەموو جۆرێن دەرمانان، دیسا ١٣ تاقیگەهان ژی بڕیار دایە داشكاندنێ ب رێژەیێن جودا ژ 25 هەتا 50% بێخنە سەر بهایێ پشكنینان و پێنج بنگەهێن تیشك و سونارێ بڕیار دایە بهایێ هەر پشكنینەكێ ب ڕێژەیا 33% كێم بكەن، ئانكو ژ ١٥ هزار دیناران بكەنە ١٠ هزار دینار.
