له‌میا ره‌سول: من ب باشی زانی بۆ ده‌مه‌كی ل چو كه‌نالان ده‌رنه‌كه‌ڤم
دهۆك، شاكر ئه‌تروشی:
له‌میا ره‌سول، په‌یامنێرا به‌رێ یا كه‌نالێ وار ل باژێرێ سلێمانیێ، كو ئه‌ڤه پتر ژساله‌كێ یه ل چو شاشان ده‌رنه‌كه‌فتیه، د دیداره‌كێ دا بۆ رۆژناما ئه‌ڤرۆ گۆت: پشتی سیاسه‌تا وی كه‌نالی هاتیه گوهۆڕین هه‌ر ژ وێ رۆژێ هه‌تا نوكه ل مالا خوه ل سلێمانیێ روونشتی مه و هنده‌ك جاران كارێ وه‌رگێرانێ و ریكلامێن ده‌نگی دكه‌م، چنكو ئه‌ز زمانێن ئنگلیزی و توركی و عه‌ره‌بی، هه‌روه‌سا كوردی ژی ب كرمانجی و سۆرانی ڤه ب باشی دزانم دكه‌م، زێده‌باری وێ چه‌ندێ گرنگیێ ب كورێ خوه دده‌م كو نوكه قوتابیه ل پشكا یاسایێ ل زانكۆیا ئه‌مریكی.
زێده‌تر گۆت: من ب باشی زانی بۆ ده‌مه‌كی ل چو كه‌نالان ده‌رنه‌كه‌ڤم، چنكو ئه‌ز پێدڤی ب بێنڤه‌دانێ مه و بۆ زانین ژلایێ چه‌ند كه‌نالان ڤه ژمن هاتیه خواستن كوجاره‌كا دی بهێمه سه‌ر شاشێ لێ من هێشتا بڕیارا ڤه‌گه‌ڕاندنا خوه نه‌دایه و ئه‌ز نوكه نوزانم كا كه‌نگی دێ دیاربم، به‌لێ دڤێت وێ ژی ژبیرنه‌كه‌ین كو هه‌تا نوكه ب ده‌هان كچ و ژنێن وه‌كو من، هه‌تا زه‌لامان ژی، خودان سه‌ربۆر و خزمه‌ت بووینه لێ نوكه خوه ب كه‌سێن مه‌غدۆر دبینن، له‌ورا دێ بێژم ل كوردستانێ چو تشت وه‌ك خوه نه‌مایه هه‌تا راگه‌هاندن ژی بێ سه‌روبه‌ر بوویه.
ل دووماهیێ گۆت: به‌ری ئه‌ز ببمه په‌یامنێر من كارێ بێژه‌ری و پێشكێشكاریێ ژی ل رادیۆ و شاشان كریه، ژوانا ل رادیۆیا نه‌وا و كوردسات و ڤین تیڤی و دووماهی كار ژی ئه‌ز په‌یامنێرا كه‌نالێ وار بووم ل باژێرێ سلێمانیێ، و هه‌رده‌م ئه‌ز دبێژم پێدڤیه مرۆڤێ راگه‌هاندكار یێ زیره‌ك و ره‌وشه‌نبیر و شاره‌زابیت د ئه‌ته‌كێتێن د رۆژنامه‌ڤانی دا و ئه‌ز حه‌ز ژ هه‌موو باژێرێن كوردستانێ دكه‌م، ب تایبه‌ت ژی زاخۆ چنكو باژێرێ منه.
