له‌هیێن هه‌ولێرێ دێ پشكداری فلمه فیسته‌ڤالان بیت
ئه‌ڤرۆ، هه‌رهین محه‌مه‌د:
ده‌رهێنه‌رێ گه‌نج هه‌وكار مسته‌فا د دیداره‌كێ دا بۆ رۆژناما ئه‌ڤرۆ گۆت نوكه مژوولی چێكرنا فلمه‌كێ دكیوم درامی مه ب ناڤێ (له‌هیێن هه‌ولێرێ) و ژ سیه و پێنچ خوله‌كه پێكهاتیه و ناڤه‌رۆكا فلمی ل سه‌ر وان زیانێن ب وه‌لاتیان و كه‌رتێ میری و تایبه‌ت كه‌فتین و گه‌له‌ك كه‌س ژی بووینه قوربانێن وان له‌هیان د ڤی فلمی دا چه‌ند كه‌سوكارێن وان كه‌سان یێن بووینه قوربانی به‌حسێ وان روودانان دكه‌ن یێن كو وان ب چاڤێن خوه دیتین و د ناڤ دا ئه‌ز بخوه ژی ئه‌كته‌ریێ دناڤ دا دكه‌م و رۆلێ پۆلیسه‌كێ به‌ره‌ڤانیا باژێری دگێرم، ژڤانه ل ده‌مه‌كێ نێزیك ب دووماهی بهێت و گه‌له‌ك ژمێژه یه ل سه‌ر ڤی فلمی كاردكه‌م، به‌لێ من هنده‌ك ئاسته‌نگێن ماددی هه‌بوون و بۆ ڤی فلمی چو لایه‌نان هاریكاریا من نه‌كریه و هه‌موو ل سه‌ر كیستێ من بوویه.
ده‌رهێنه‌ری فلمی زێده‌تر گۆت: ئه‌ڤ فلمه پشتی ب دووماهی دهێت دێ بیته ده‌نگ و باس بۆ گه‌له‌ك تیڤیێن ب ناڤوده‌نگ، به‌لێ ناهێته به‌لاڤكرن، چونكو دێ پشكداری گه‌له‌ك فلمه فیسته‌ڤالان بیت و ئه‌ڤه دبیته سێیه‌مین به‌رهه‌مێ من و كارێن من یێن دی پشكداری چه‌ندین فلمه فیسته‌ڤالێن نێڤده‌وله‌تی بووینه ل وه‌لاتێن بیانی و پێنج خه‌لاتێن جیهانی من ب ده‌ست خوه ڤه ئیناینه و فلمێ به‌ری ڤی ل سه‌ر ئاستێ عیراقێ یێ ئێكێ بوو كو ناڤه‌رۆكا وی فلمی ل سه‌ر نه‌خۆشیا كۆرۆنایێ بوو و هه‌روه‌سا سه‌ره‌رایی ڤێ چه‌ندێ وه‌كو ئه‌كته‌ر ژی پشكداری چه‌ندین فلم و درامایان بوویمه.
