له‌یلا ئاگری دێ نووترین سترانا خوه كلیپ كه‌ت
ئه‌ڤرۆ، رێوار محه‌مه‌د ره‌شید:
سترانبێژا رۆژئاڤایێ كوردستانێ (له‌یلا ئاگری) كو نوكه ل پارێزگه‌ها هه‌ولێرێ دژیت د دیداره‌كێ دا بۆ به‌رپه‌رێ هونه‌ری یێ رۆژناما ئه‌ڤرۆ دیار كر كو ل رۆژێن بۆری وێ سترانه‌كا نوو یا دوقۆلی كو دگه‌ل سترانبێژ (سیپان عفرینی) گۆتیه و بابه‌تێ وێ ژی ل دۆر ئه‌ڤینیێ یه ژ قووناغا تۆماركرنێ ب دووماهی ئینایه و نوكه یا به‌رهه‌ڤیان بۆ كلیپكرن وێ سترانێ دكه‌ت و گۆت: “د پلانا من دایه ڤێ سترانێ ل پارێزگه‌ها دهۆكێ یان ژی یا هه‌ولێرێ كلیپ بكه‌م، به‌لێ هه‌تا نوكه من بڕیارا دووماهیێ ل دۆر ڤێ چه‌ندێ نه‌دایه، ئه‌ڤه دده‌مه‌كی دایه كو هه‌ڤژینێ من (جودی عه‌فرینی) كارێ وێنه‌گرتن و ده‌رهێنانێ بۆ كلیپێن من دكه‌ت”.
ناڤهاتیێ ئاماژه د وێ چه‌ندێ كو پرۆژه‌كێ دی ژی یێ هونه‌ری ل به‌رده‌ستێ وێ هه‌یه ئه‌و ژی گۆتنا سترانه‌كێ یه ل سه‌ر هه‌ر چار پارچێن كوردستانێ كو دێ 10 سترانبێژێن كورد د ڤێ سترانێ دا پشكداربن، به‌لێ نوكه چاڤه‌ڕێ وه‌زاره‌تا ره‌وشه‌نبیری و لاوان یا حوكمه‌تا هه‌رێما كوردستانێ دكه‌ت كۆژمه‌كێ پاره‌ی بۆ تۆماركرن و كلیپكرنا ڤێ سترانێ ب مه‌زێخیت، ژ به‌ر كو وه‌زاه‌تا ناڤهاتی سۆز دایه كو كۆژمه‌كێ پره‌ی ژ ئالیێ وان ڤه بۆ ڤێ سترانێ بهێته مه‌زاختن و گۆت: “من دڤێت ب رێیا گۆتنا سترانان خزمه‌تا وه‌لاتێ خوه بكه‌م، به‌لێ چوجاران ناچمه ئاهه‌نگێن تایبه‌ت و داواتان بتنێ كارێن خوه یێن هونه‌ری ل ده‌زگه‌هێن ڕاگه‌هاندنێ و سۆشیال میدیایێ دا به‌لاڤ دكه‌م”.
