لژنا ته‌ندروستی: چار یاریزانێن ئه‌رجه‌نتین سه‌رپێچیا پرۆتوكۆلا كورونایێ كرینه
ئه‌ڤرۆ،
ل شه‌ڤا ده‌ربازبوویی ئێك ژ روودانێن سه‌یر یا یاریا د ناڤبه‌را هه‌ردو هه‌لبژارتیێن به‌رازیل و ئه‌رجه‌نتین دا په‌یدابووی ژ چارچووڤێ ڤاڤارتنێن كێشوه‌رێ ئه‌مریكا باشۆر ده‌ربازبوون بۆ مۆندیالا جیهانی ل قه‌ته‌ر یا 2022 كو پشتی ده‌ستپێكرنا یاریێ ب شه‌ش خوله‌كا لژنه‌كا تایبه‌ت یا ته‌ندروستی هاتنه دناڤ یاریگه‌هێ دا بێی رازیبوونا دادڤانان و سه‌رپه‌رشتێ یاریێ ب ئه‌گه‌رێ چار یاریزانێن ئه‌رجه‌نتین سه‌رپێچیا پرۆتۆكۆلا ڤایروسێ كورونایێ كربوو.
لدویڤ ده‌زگه‌هێ دووڤچوونێ یێ ته‌ندروستیا وه‌لاتێ به‌رازیل كو چار یاریزان ژ وه‌لاتێ ئنگلێز هاتینه دناڤ ئاخا به‌رازیل دا دڤیابا بۆ ماوێ 14 رۆژان لبن چاڤدێریا ته‌ندروستی دابان ئه‌وژی جیۆڤانی لۆ سیلس و كریستیان رۆمێرۆ ژ یانا تۆتنهام، گۆلپارێز ئیمیلیانۆ مارتینێز ژ ئارسنال، ئیمیلیانۆ بۆیندیا ژ ئاستۆن ڤێلا كو ل خالا زالگه‌ها سنوری ئه‌وێن پێزانین خه‌له‌ت داینه لژنا ته‌ندروستی و دیار نه‌كربوون كو د ماوێ 14 رۆژێن بوری دا سه‌ردانا وه‌لاتێ ئنگلترا كربیت و ل رۆژا یاریێ برێیا پاسپۆرتا وان هاتینه دیاركرن و ژلایێ لژنا ناڤهاتی ڤه به‌ری یاری ب دو ده‌مژمێران داخازا ژ وان هاتبووكرن كو بمینه د ئۆتێلێ ڤه و نه چنه یاریگه‌هێ لێ ئه‌وان سه‌رپێچیكر، له‌ورا ته‌ندروستیا یاریزانان گرنتره ژ ڤێ یاریێ.
لدویڤ رێنومایێن وه‌لاتێ به‌رازیل نا بیت چو كه‌س ژ وه‌لاتێ ئنگلترا، هندستانێ یان باكورێ ئه‌فریقیا سه‌ره‌دانا وه‌لاتێ به‌رازیل بكه‌ن، ژلایێ خوه‌ڤه ئێكه‌تیا ته‌پاپێی یا كێشوه‌رێ ئه‌مریكا باشور بڕیاردا یاری نه هێته كرن و دێ نڤێسارا سه‌رپه‌رشتێ یاریێ بۆ لژنا به‌ریكانا و دووڤچوونێ ل فیفایێ هێته فرێكرن.
ژلایێ خوه‌ڤه ئێكه‌تیا ته‌پا پێی یا ئه‌رجه‌نتینی نه‌رازیبوونا خوه دیاركر لسه‌ر ئه‌وێ سه‌ره‌ده‌ریا ل گه‌ل هه‌لبژارتیێ وان هاتیه كرن ل ساوپاولۆ و لژنا ته‌ندروستی یا به‌رازیل گۆنه‌هباركر بێ رێزیكرن ل شاندێ وان كریه كو ئه‌ڤچه‌نده دووره ژ گیانێ وه‌رزشی تایبه‌ت دیاریه‌كا هوسا یا مه‌زن و گرنگ دا، نه‌رازیبوونا خوه بۆ ئێكه‌تیا ته‌پا پێی یا جیهانی فیفا هنارتیه بۆ دووڤچوونێ ل سه‌ر ڤی بابه‌تی بكه‌ن.
بۆ زانین هه‌لبژارتیێ به‌رازیل سه‌رێ لیستا كۆما ئه‌مریكا باشۆر دهێت ب21 خالان ئه‌رجه‌نتین ب 15 خالان رێزا دویێ، ئیكوادۆر ب زێده‌تری یاریه‌كێ رێزا سێیێ ب 13 خالان و ئورۆگوایی ب 12 خالان رێزا چارێ دهێن.
