لژنا فەتوایێ ل دهۆكێ كڕینا یاریا لابووبوو حەرامكر
هەرهین محەمەد:
ئەندامەكێ لژنەیا فەتوایێ ل پارێزگەها دهۆكێ دیاركر كو هەر تشتەكێ ب بەرزەیی و بەختی ڤە گرێدای بیت حەرامە و دبێژیت: یاریا لابووبوو ژی ب بەختی ڤە یا گرێدایە و مرۆڤ نزانیت چو تێدایە و پارە ل سەر دهێتەدان، لەو حەرامە.
مەلا عسمەت گوهەرزی، ئەندامێ لژنەیا فەتوایێ ل پارێزگەها دهۆكێ بۆ رۆژنامەیا ئەڤرۆ گۆت: «د ئایینێ ئیسلامێ دا دەرفەتەكا مەزن بۆ بازرگانیێ هەیە، لێ هەر تشتەكێ فێلبازی تێدا هەبیت، یان زیان ب لایەكی بكەڤیت، یا هاتیە قەدەغەكرن، ل دووڤ پێزانینێن مە ئەو یاریا بناڤێ (لابووبوو) یاریەكە و مرۆڤ نزانیت چو د ناڤ دایە و وەكو یاریا بەختی یە و گوژمەكێ پارەی پێ دهێتەدان، لەو یا حەرامە».
گۆتژی: «ئێك ژ گرنگترین مەرجێن كڕین و فرۆتنێ د ئایینێ ئسلامێ دا، پێدڤییە ئەو تشتێ دهێتە كڕین و ئەو پارێ پی دهێتەدان یێ دیاربیت، نابیت فرۆتن یا بەرزەبیت، ئانكو هەژمارێن پێشچاڤ دیاربن، لەو كڕینا ئەڤێ یاریێ حەرامە و دڤێت مرۆڤی موسلمان خۆ ژێ دوور بكەت».
