لژنا په‌روه‌ردێ داخوازا روونشتنه‌كا په‌رله‌مانی ل دۆر ده‌رمالێن قوتابیان دكه‌ت
ئه‌ڤرۆ:
لژنا په‌روه‌ردێ و خواندنا بلند ل په‌رله‌مانێ كوردستانێ داخوازا روونشته‌نه‌كا تایبه‌ت یا په‌رله‌مانی ل دۆر ڤه‌گه‌ڕاندنا ده‌رمالێن قوتابیێن زانكۆ و په‌یمانگه‌هان دكه‌ت و سه‌رۆكێ لژنێ ژی دبێژیت: مه 71 ئیمزا بۆ ڤێ مه‌ره‌مێ كۆمكرینه.
عه‌بدولسه‌لام دۆله‌مه‌ری، سه‌رۆكێ لژنا په‌روه‌ردێ و خواندنا بلند ل په‌رله‌مانێ كوردستانێ، د كۆنفرانسه‌كێ رۆژنامه‌ڤانی دا خویا كر، ب رێیا لژنا وان، 71 ئیمزایێن په‌رله‌مانتاران هاتینه كۆمكرن و گۆت: “ئه‌م دخوازین د وێ روونشتنێ دا وه‌زیرێ دارایی و ئابووری و وه‌زیرێ خواندنا بلند و ڤه‌كۆلینێن زانستی به‌رهه‌ڤ ببن بۆ پشتراستبوون ژ ئه‌گه‌رێ راگرتنا ده‌رمالێ قوتابیان و دیتنا رێ چاره‌یه‌كا گونجای و ڤه‌گه‌ڕاندنا وی مافێ ده‌ستپیكی یێ قوتابیێن زانكۆ و په‌یمانگه‌هان”.
گۆت ژی: “ئه‌م ئه‌و توندوتیژیێن دوهی ل زانكۆیا سلێمانیێ، د ناڤبه‌را قوتابیان و هێزێن پۆلیسان دا رووداین، شه‌رمزار دكه‌ین، ژ به‌ركو داخوازیا قوتابیان یا ره‌وایه و ب تنێ داخوازا مافێن خوه یێن سه‌ره‌تایی كرینه”.
سه‌رۆكێ لژنا په‌روه‌ردێ و خواندنا بلند ئاشكرا ژی كر، ئه‌و داخوازێ ژ لایه‌نێن شۆله‌ژێ دكه‌ن، كو ل دووڤ داخوازیێن وان قوتابیان بهێن و گۆت: “ئه‌م ژی ب هه‌موو شێوان پشته‌ڤانیێ ل داخوازیێن وان قوتابیان دكه‌ین”.
