لژنەیا ڕێكاران و بڕیارێن ڕەگەز پەرێسانە
ئیحسان حەسەن
بڕیارێن ڤێ داویێ ئەوێن ژلایێ لژنەیا ڕێكاران ل فێدراسیونا فوتبۆلا ئیراقێ دژی هەر دو یانەیێن پارێزگەهێ دهۆك و زاخۆ هاتینە سەپاندن، لسەر ئەنجامێ وان ڕوودانێن دفینالا كۆپا ئیراقێ دا هاتینە ئەنجامدان، درێژەپێدانە ب وان بڕیارێن ڕەگەزپەرێسانە دژی یانەیێن مە یێن هەرێما كوردستانێ ئەوێن بدرێژاهییا وەرزێ بوری كەڤتینە لبن بارێ ڤان سزایان، ڕەنگە ئێك بێژیت مانێ هندەك جاران پشتەڤان یان ڕەفتارێن ئێك ژ كارگێریێن تیمێ، یان ڕاهێنەرەك یان یاریزانەك ئەگەرێ دروستبوونا گرژیان و تێكدانێ بووینە ژهەژی سزادانێ نە، ئەم ژی دگەل هندێ نە بۆ هەر ڕەفتارەكا دوور ژ گیانێ وەرزشی سزایێن تووند هەبن، ئەو كەسێن دبنە ئەگەرێ تێكدانا یاریگەهێ، پێدڤییە بهێنە دەستنیشانكرن و دووركرن ژیاریگەهان، ژبەركو چ جاران ئەو دەربرینێ ژ رەوشت و تیتالێن مە یێن كوردەواری و خەلكێ پارێزگەها مە ناكەن، لێ ئەز هووسا دبینم كو ئەگەرێ سەرەكی یێ ڤێ ڕەگەزپەرێسانە ئەو ئالۆزیا نوكە هەی، هەر لژنەیا ڕێكارانە و ئەو بڕیارێن ژلایێ وان ڤە دهێنەدان نەدادیەك و جوداهییەك دبریارێن واندا هەیە دژی یانەیێن هەرێما كوردستانێ ئەگەر ئەم براوەرد بكەین دگەل یانەیێن دەڤەرێن دی یێن ئیراقێ، كو هەر ئەڤ سزایەنە دبنە هۆكارێن پتر پەیدابوونا ڕەگەزپەرێسانە وەرزشی دناڤا پەلۆكێن یاریگەهان دا ووەدكەن كو زێدەتر لێ بهێن، مە نەگوتییە دادیێ نەكەن، بریاران نەدەن، لێ نە ڤێ شێوەیێ ژبەر كو ئەڤ دژایەتییە دێ ئاریشەیان مەزنتر لێ كەت، دیارە ژی ئەڤ لژنە پێدڤی ب كەسانێن وێرەك هەیە بۆ دانا بریاریان، نە یێن ترسۆناك یێن بۆ بەرژوەندیا هندەك لایەنان كار دكەن، ژبەر كو خواندنا جەماوەری بۆ ڤان بریارێن ڤێ داویێ ب تایبەت ئەوێن مە دسوشیال میدیایێ دا دیتن، دیارە هەموو ژڤێ رەوشێ نە درازی نە، ژبەركو باش دزانن كو چ هەڤسەنگی دبریارێن فێدراسیونا ئیراقێ دا نینن، دبینن هەر ژ دەستپێكرنا خولا ستێرێن ئیراقێ هەر رۆژ ئاریشەكە، هەر حەفتتیەكێ كێشەكە و هەر مەهەكێ كارەساتەكە، ئەوان پێ نەخۆشە كو یانەیێن مە گەهشتین ڤێ پلا سەرفەرازیێ، ژبۆ كێمكرنا ناڤێ یانەیێن مە، ئەو وینەیێ وان یێ جوان ب تایبەت یێن پشتەڤانان، یاریزانێن ژمارە 12 دناڤا یاریگەهان دا ڤان بریاران ددەن، ڤێجا پرسیار ئەوە هەتا گەنگی دێ ئەڤ زۆلمە ل یانەیێن مە هێتە كرن، ما دەمێ هندێ نەهاتیە مە هەلویستەكێ ئێكگرتی دژی پێرابوونێن ئەندامێن ڤێ لژنەیێ و فێدراسیونا رەگەز پەرستی هەبیت، سنۆرەكی بۆ ڤان كەسان بدانین، كو ژبلی مە هزەلا شاشیێن دادڤان ولژنەیا وان ئەم ڤان رێكارێن مەترسیدار و بێ بنەما بینین، ڤێ پرسیارێ پێدڤی ب بەرسڤدانێ یە، چونكو ئەڤرۆكە یا بوویە راستیەك لسەر ئەردی بەری لسەر كاغەزێ، ئەگەر ئەڤ رەوشە یا بەردەوام بیت بۆ ڤان رەگەزپەرستان، هەردەم یی ئێكی سزابدەت و چاڤێ خوە یێ ل دویێ ب لقینیت، خودێ هاریكار بیت.
