لژنەیەكا بلند بۆ تاپۆكرنا یەكەیێن وەبەرهێنانێ هاتیە پێكئینان
هەولێر، قائید میرۆ:
رێڤەبەرێ گشتیێ تۆماركرنا خانیان ل هەرێما كوردستانێ ئاشكرا كر، حوكمەتێ لژنەكا بلند بۆ تاپۆكرنا یەكەیێن وەبەرهێنانێ پێكئینایە و بڕیارە هەموو شوقە و خانی و ڤلایێن ژ لایێ وەبەرهێنانێ ڤە هاتینە ئاڤاكرن بهێنە تاپۆكرن.
لوقمان عومەر، رێڤەبەرێ گشتیێ تۆماركرنا خانی و بەران ل هەرێمێ بۆ رۆژناما ئەڤرۆ دیاركر، لیژنەكا بلند ژ لایێ حوكمەتا هەرێما كوردستانێ ڤە هاتیە پێكئینان ب مەرەما تاپۆكرنا وان یەكەیێن ئاكنجیبوونێ یێن ژ لایێ وەبەرهێنانێ ڤە هاتینە ئاڤاكرن و گۆت: «نوكە لیژنە یا پێداچوونێ دكەت و پشتی تەمامبوونا رێكارێن قانوونی، دەست ب پرۆسا تاپۆكرنا هەموو شوقە و خانی و ڤلایان دێ هێتە كرن و ل سەر ناڤێ وان وەلاتیان دێ هێنە تاپۆكرن یێن گرێبەست ل گەل كۆمپانیێن وەبەرهێنانێ هەین».
لوقمان عومەر گۆتژی: «زێدەتری 200 هزار یەكەیێن ئاكنجیبوونێ هاتینە ئاڤاكرن و هەتا نوكە ل سەر خودانێن وان نەهاتینە تاپۆكرن، بەلێ بڕیارا حوكمەتا هەرێما كوردستانێ ئەڤەیە، كو هەموو یەكە بهێنە تاپۆكرن و نوكە د قۆناغێن پارڤەكرنێ دانە، چونكی ژ چەند قۆناغەكا پێكهاتیە و لیژنەیا بلند ژی ل سەر كارێ خۆ یا بەردەوامە ب مەرەما دەستپێكرنا پرۆسا تاپۆكرنێ».
