لیوا یەحیا رەسول: رەوشا سنۆرێن ئیراقێ ل گەل سووریێ یا ئارامە
پەیڤدارێ فەرماندەیا گشتییا هێزێن چەكدارێن ئیراقێ راگەهاند: سنۆرێن مە ل گەل سووریێ ب تمام یێن هاتینە ب هێزكرن و هێزێن پشتەڤانیێ و كەرەستەیێن تەكنیكی یێن پێشكەفتی ژی مە یێن داناین.
دوهی ئێكشەمبی 8/12/2024، لیوا یەحیا رەسول، پەیڤدارێ فەرماندەیا گشتییا هێزێن چەكدارێن ئیراقێ گۆت» سنۆرێن مە ل گەل سووریێ ب تمامی یێن هاتینە ب هێزكرن و ژ بلی هێزێن زێرەڤانێن سنۆری، هێزێن مەزن یێن پشتەڤانیێ ژی مە یێن هنارتینە سنۆرێ خوە، كو هێلا بەرگریێ یا پێكئینای و ل دەمێ پێدڤی دشێن هاریكارییا زێرەڤانێن سنۆرێ بكەن».
لیوا یەحیا رەسول ئاماژەكر» هەتا نوكە هیچ گرفتەك ل سنۆرێن مە ل گەل سووریێ روونەدایە، چونكە مە پێشتر كار بۆ وی بابەتی یێ كری، كو ژ بلی دیوارێن كۆنكریتی، كامیرەیێن چاڤدێریێ و كەرەستەیێن تەكنیكی یێن پێشكەفتی مە یێن داناین. لەوما دشێین بێژین سنۆرێن مە ب شێوەیەكێ باش یێن هاتینە پاراستن».
هەر دوهی ئێكشەمبی، عەبدولئەمیر شەممەری، وەزیرێ ناڤخوە ل ئیراقێ راگەهاند» فەرماندەیێ گشتیێ هێزێن چەكدار ل ئیراقێ بەردەوام دووڤچوونێ بۆ رەوشا سنۆرێن ئیراقێ ل گەل سووریێ دكەت و سنۆر یێن هاتینە ب كونترۆلكرن و پاراستن».
ئیراقێ و هەرێما كوردستانێ زێدەتر ژ 600 كیلۆمتەران سنۆرێ هەڤپشك ل گەل سووریێ ورۆژئاڤایێ كوردستانێ یێ هەی.
