لیژنەیا بلند یا هەماهەنگییا هەڤپشك د ناڤبەرا ئەمریكا و ئیراقێ دا هاتە پێكئینان
قونسلخانەیا ئەمریكا ل هەولێرێ بەیاننامەیەك بەلاڤكریە و تێدا هاتیە: د چارچۆڤەیێ هەڤپشكییا ستراتیژی یا د ناڤبەرا ئیراقێ و ئەمریكا دا و د ناڤبەرا سالێن درێژ یێن دۆستایەتی و هەڤكارییا ستراتیژی یا هەڤپشك د بوارێن سیاسی، ئابووری و ئەمنی دا – كو ب بزاڤێن هەڤپشك بۆ تێكشكاندنا داعشێ گەهشتە گۆپیتكێ – بڕیار هاتە دان لیژنەیا بلند یا هەماهەنگییا هەڤپشك بهێتە پێكئینان.
د ئێكەم كۆمبوونا لیژنەیا بلند یا هەماهەنگییا هەڤپشك دا، هەر دوو ئالیێن ئیراقی و ئەمریكی بڕیار دان هەڤكارییان چڕتر بكەن بۆ رێگریكرنێ ل هێرشێن تیرۆریستی و پشتراستكرنێ كو ئاخا ئیراقێ وەك خالەكا دەستپێكێ بۆ چو جۆرە دەستدرێژییان دژی گەلێ ئیراقێ، هێزێن ئەمنی یێن ئیراقێ، دەزگەهـ و سامانێن ستراتیژی یێن ئیراقێ، هەروەسا دژی كارمەندێن ئەمریكی، هنارتەیێن دیپلۆماسییان و هەڤپەیمانییا نێڤدەولەتی نەهێتە بكارئینان.
هەر دوو ئالییان دوپاتی ل سەر پێگیریبوونا خوە كر كو ئیراقێ ژ دەرڤەی بازنەیێ هەڤڕكیێن سەربازی یێن بەردەوام ل دەڤەرێ بهێلن، ب رێزگرتن ل سەروەریا وێ ب تەمامی و پشتەڤانیكرنا ئیراقێ د پشتراستكرنێ دا كو ئاخ، ئەسمان و ئاڤێن وێ یێن هەرێمی بۆ گەفكرن ل ئیراقێ، یان وەلاتێن دەوروبەر و دەڤەرێ نەهێنە بكارئینان.
هەر دوو ئالییان دووپات ل سەر نووژەنكرنا پێگیریبوونا خوە كر بۆ هەماهەنگیكرنێ د بزاڤان دا بۆ بەرهەنگاربوونا تیرۆرێ ب شێوەیەكێ كو پێشینەیێ بدەتە گاڤێن ئیراقێ بۆ ب دەستڤەئینانا ئارمانجێن هەڤپشك، ب جۆرەكێ كو ئارامیێ بپارێزیت و پاراستنێ ل سەروەریا ئیراقێ بكەت.
