لیڤه‌رپۆل و ئه‌نتر د دیداره‌كا ڤه‌بڕ دا و بایرن هه‌مبه‌ری ئاسته‌نگا سالزبۆرگێ
ئه‌ڤرۆ،
چاڤه‌ڕێ دهێته كرن ئه‌ڤرۆ ل ده‌مژمێر 11ێ شه‌ڤ دو یاری ژ چارچووڤێ هه‌ڤڕكیێن قۆناغا 16ێ و ده‌ربازبوون بۆ قۆناغا هه‌شتێ یا قاره‌مانیا یانێن ئۆرۆپا قاره‌مانێن خولا چامپیۆنز لیگ هێنه ئه‌نجامدان.
لیڤه‌رپۆل – ئه‌نتر میلان
پشته‌ڤانێن هه‌ردو یانا ب ژڤانن بۆ یاریا ئه‌ڤ شه‌ڤه یا چاره‌نڤیس ده‌مێ یاریگه‌ها ئانفێلد مێڤانداریا خودانێن ئه‌ردی لیڤه‌رپۆل یا ئنگلێزی و هه‌ڤڕكا خوه ئه‌نتر میلان یا ئیتالی د یاریه‌كا بهێز و پێشبینیێن جودا دا كه‌ت، لیڤه‌رپۆل ئه‌وا پێنگاڤا ئێكێ د یاریا بوری دا سه‌ركه‌فتیانه ده‌رباز كربوو ده‌مێ ل یاریگه‌ها ئه‌نترێ شیایی ب دو گۆلا بێ به‌رامبه‌ر سه‌ركه‌فتنێ تۆماربكه‌ت ب ئیمزایا فرمینیۆیی و محه‌مه‌د سه‌لاحی كو ئه‌ڤ سه‌ركه‌فتنه هیڤیێن یانا ئنگلێزی بۆ ده‌ربازبوونێ نێزك كرینه و بتنێ پێدڤی ب وه‌كهه‌ڤیێ یه یان هه‌كه خوساره‌ت بیت ب جوداهیا گۆله‌كێ ژی دێ ده‌ربازبوونێ مسۆگه‌ر كه‌ت، هه‌مبه‌ری وێ ئه‌نتر پێدڤی ب سه‌ركه‌فتنێ یه زێده‌تری دو گۆلان هه‌یه بۆ ئه‌نجامدانا هه‌ردو نیڤێن زێده‌كری تایبه‌ت پشتی هه‌لوه‌شاندنا سیسته‌مێ گۆلان د ناڤ ئه‌رد و ده‌رڤه‌یی یاریگه‌ها خوه دا ئانكو ئه‌نجامێ سه‌ركه‌فتنا ئه‌نتر ب چه‌ند گۆلان بیت دێ به‌ره ب دو نیڤێن یێن یاریێ چیت، لدووڤ ئامارێن هه‌ردو یانا لێڤه‌رپۆل چار سه‌ركه‌فتن و خوساره‌تیه‌ك تۆماركرینه، ڤه‌گه‌ڕیانا ستێرا یانا ئیتالی ئیڤان بیریسێچ ژ هنگاڤتنێ و ئاست بلندیا هێرشبه‌ر لاوتارۆ مارتینێز زێده‌باری شیانێن ئیدین دیچیكۆ، برۆزۆڤێچ، بارێلا، باستۆنی و دومفرێس ئه‌وێن دێ هێزه‌كا مه‌زن د یاریا ئه‌ڤ شه‌ڤه دا نیشانده‌ن ژبه‌ركو چو ڕێك نینن ژبلی سه‌ركه‌فتنێ، لێ خودانێن ئه‌ردی دێ چه‌ك داربیت ب جه‌ماوه‌ر و كۆمه‌كا ستێرێن خوه ژوانا سادیۆ مانی، محه‌مه‌د سه‌له‌ح، لویس دیاز، هندرسۆن، كیتا، ڤان دایك و گۆلپارێزێ خودان شیان ئه‌لیسۆن.
بایرن میۆنخ – رێد بۆل سالزبۆرگ
بڕیاره یاریا دویێ یا ئه‌ڤ شه‌ڤه ل یاریگه‌ها ئه‌لیانز ئارینا بهێته كرن ده‌مێ خودانێن ئه‌ردی یانا بایرن میونخ یا ئه‌لمانی مێڤانداریا یانا رێدبۆل سالزبۆرگ یا نه‌مسا بكه‌ت، د یاریا چوونێ دا یانا ئه‌لمانی ئێك ژ به‌ربژارێن ناسناڤێ چامپیۆنزێ تووشی وه‌كهه‌ڤیێ بوو ب گۆله‌كێ بێ به‌رامبه‌ر كو ئه‌ڤ ئه‌نجامه ده‌لیڤا ده‌ربازبوونێ بۆ هه‌ردو یانا به‌رده‌ست كریه، یانا باڤاریا باش دزانیت ئه‌ركێ وێ ب سانه‌هی نینه و ژبلی سه‌ركه‌فتنێ چو ئه‌نجامێن دی د به‌رژوه‌ندیا وێ دانینن ئه‌گه‌ر نه دوور نابیت یانا مێڤان دیرووكێ تۆماربكه‌ت و ئێك ژ زلهێزێن ئۆرۆپا دووربێخیت، هه‌رچه‌نده پێشبینی هوسا دهێنه دیتن كو بایرن نێزكتره بۆ سه‌ركه‌فتنێ و ده‌ربازبوونێ ژبه‌ر هه‌بوونا ژماره‌كا خالان ژوانا دناڤ ئه‌رد و جه‌ماوه‌رێ خوه دایه و هه‌بوونا ستێرێن یانێ وه‌كو روبێرت لیڤاندۆڤێسكی، مۆله‌ر، لیرویی سانی، جه‌مال مۆسیالا، سێرجی جنابری، كیمتچ، هه‌مبه‌ری وان ده‌نگۆباسێن نه‌خووش هه‌نه كو دبیت هه‌تا 15 یاریزان و ئه‌ندامێن تیما سالزبۆرگ تووشی ڤایرۆسێ كۆرۆنایێ بووینه و دوور نینه هه‌تا شه‌ش یاریزانێن كاریگه‌ر یاریێ نه‌كه‌ن، لێ راهێنه‌رێ یانا نه‌مسا كریستۆڤ فرۆند رژدیا خوه دیاركر كو دێ بهێز یاریێ كه‌ین و ئه‌و یاریزانێن تووشی كۆرۆنایێ نه‌بووین به‌رهه‌ڤن.
