لەشكرێ ئیراقێ هەر خولەكەكێ 20 تۆپ ل گوندێ مە ددان ئەم نەچاربووین مە گوند چۆل كر
سالار محەمەد دۆسكی:
2- 3
دەمێ ئەڤ شەرە دروست بووی وی دەمی سەركردایەتی یا پارتی ژ كوماتەی هاتە (زێوا شكان) و چالاكیێن لەشكری هەر پێشمەرگەی ل دوڤ شیانێن خوە ئەنجام ددان، وی دەمی بابێ من بۆ بەرپرسێ رێكخراوا (شەهید عەلی عوبیدوللا) و دەمێ شەرێ ئیراق و ئیرانێ هاتیە ئەنجامدان گۆتن مالێن خوە بینە سەر سنوران، و پشتی بورینا پێنچ شەش سالان مە مالێن خوە ڤەگوهاستن و ئەم هاتینە گۆندێ (ئورە) و پشتی شەڕێ هەر دو وەلاتێن ئیراق و ئیرانێ پێشمەرگە بەرەف زێدەبوونێ چوو، و هندەك مەفرەزێن پێشمەگەی هەتا (300) كەسان چوون، و پتریا خەلكی نەچوونە شەڕێ ئیراق وئیرانێ ورەڤین بەرەف پێشمەرگەی هاتن، ل سالا 1983 حوكمەتا توركیا هێزەكا گەلەك مەزن ئینا دەڤەرێ و سەركردایەتیا پارتی دیموكراتی كوردستان فەرمان دا گۆتن سنوران بەردەن.
هەمان پێشمەرگەیێ شۆڕەشا گولانا پێشكەفتنخواز ئەو ژی گۆت: ئەم یێ ل چیایێ گارەی و گەلەك پێشمەرگە ل گەل بابێ من (حەسەن ئەرەدنی) نە وی دەمی (سەید سالح) بەرپرسێ لژنا ئامێدیێ) بوو، و پۆستەك هنارت و گۆت (حەسەن ئەرەدنی) ب هەمی پێشمەرگێن خوە ڤە دەستیردان هەیە وی دەمی هەیڤا شواتێ بوو 20 ل سەر 21 هەیڤا دو بوو و مە دەستیردان وەرگرت و هەر كەسەك چوو مالا خوە و ئەم ژی بەرەف مال ڤە هاتین كو مە دەستیردان وەرگرتیە و مالا مە ل (ئورە) بوو وی دەمی هەر كەسەكی بخوە خانیەك ل جهەكی دروستكربا و ئەڤە وەك خوە پاراستن ژ بەر فرۆكا و یان هەر تشتەكێ نە یێ سرۆشتی روو بدەت و هەتا ئەم گەهشتینە گوندێ( ئورە) مە دیت ڕەنیا بەفرێ ب سەر مالا مە دا هاتیە خوار و سێ زارۆكێن من دو كچ و كورەك ل گەل هەڤژینا من و خویشكا من كەفتینە بن ڕەنیا بەفرێ و شەهید بووینە و خەلكی ڤەشارتینە و ئەف روودانە بەری (10) رۆژا ژ چوونا مە بۆ مال هاتیە ئەنجامدان و دەیكا من گەلەك بێ سەرۆبەر ب بوو، و برایێ من ل ژوورەكا دی بوو ئەو ژی ب برینداری قورتال ب بوو ئانكو بتنێ برایێ من (وەحید) و دەیكا من قورتال ب بوون و ئەم هاتین مالەكا خالی و كاڤل و ژ ئەوێ وەستیانێ و نەخوشیێ ئەم ب سەر ئەڤێ كارەساتێ هەلبووین، و دەمێ حوكمەتا توركی هێزەكا مەزن ئینایە سەر سنوری و گۆتن دڤێت گوندێ( ئورە) بهێتە بەردان، و ئەم هاتینە گوندێ خوە (ئەرەدنا) و سالەك دەرباز بوو، دوڤدا من ژنەكا دی خواست بخوە ئینا بو 1984 و خودێ پێنچ زارۆك دانە من دو كچ و سێ كور و سوپاس بۆ خودێ بەێ مخابنی ڤە كورەكێ من 2018 شەهید بوو، و ل گوندێ ئەرەدنا هندەك مێش بخوە خودانكرن و فرۆكێن توركا هاتن ڕەمی كر و كورێ من خودان خێزان و زارۆك شەهید بوو، و نوكە ل بندافا خانیێ من دا دژین باوەركە دەمێ چم دەف ئەوا زارۆكان دبینم دلێ من گەلەك بۆ دسوژیت، ل سالا 1987 هێزەكا گەلەك مەزن هاتە دەڤەرێ وی دەمی ئەم ل گوندێ( ئەرەدنا) بووین و ئەو هێز هوسا یا مەزن بوو و ژ هەمی ئالیان ڤە هاتنە مە و ئەم ماینە ل گوندی و مە شەر ل گەل كر و رێژەكا مەزن ژ ئەوێ هێزا لەشكری هاتنە كوشتن، و باوەر كە پتر ژ 100 لەشكرێن دوژمنی هاتنە كوشتن و دگۆتنە وێ هێزێ هێزا مەلكو و (تەمەر رەمەزان كوچەر) بەرپرسێ لژنا ناوچا ئامێدیێ بوو، و هاتە دەڤەرێ و گۆتە بابێ من (حەسەن ئەرەدنی) ئێدی هوون نەشێن ل گوندی بژین و دنابەرا خولەكەكێ دا (20) تۆپ ب گوندی دكەفتن و ئەم نەچار بووین مە گوندێ خوە بەردا، و ئەم هاتینە گوندێ( ئورە)، و دوڤدا ئەم چووینە گوندێ (تیشەنبیكی) وێ سالێ داستانا (كانی ماسێ) چێ بوو وی دەمی منەزما مە ژی پشكداری وێ داستانێ ب بوو، بۆ سالا 1988 و ئەڤێ سالێ داستانا دێرەلوكێ دروست بوو و ئەڤە هەیڤا ئێك بوو و پشتی مە ئەف چالاكیە ژی ئەنجام دایی ئەم هاتینە ڤە، و دوڤدا ل هەیڤا تەباخێ ئەنفالێن رەش چێ بوون وی دەمی ئەز ل مال بووم وی دەمی (مستەفا مزیری) بەرپرسێ لژنا ئامێدیێ بوو، و من هەسپەك هەبوو و ئێڤار بوو ل هەسپێ خوە سیار بووم و بابێ من گۆت دێ كیڤە ی من گۆت دێ چمە لژنێ چونكە ئەزێ ڤێ هێزێ بینم زانم ئەڤە نەهێزا مەیە ئەم شەری ل گەل بكەین و ئەو هێزا دهێت شەری ناكەت، و گەلەك یا مەزن و یێ سەر جادێ بەرەف كانی ماسێ ڤە چن وی دەمی لیوا لەشكری ل كانی ماسێ بوو وی دەمی بارەگایی لژنێ ل گەلیێ بێسیێ بوو چومە دەف (مستەفا مزیری) من گۆتێ تە ئاگەه ژ بابەتی هەیە، گوت بەلێ دبینم لەشكرێ بەرەف دەڤەرێ دهێت و گۆت دێ شكەفتنێن مە هاریكاریا مە كەن، من گۆتێ (مستەفا مزیری) راستیێ بۆ خەلكی بێژن ئەم نەشێن ئەڤی شەڕی بكەین، و پشتی زڤریم من بابەت بۆ بابێ خوە شرۆڤەكر و گۆت دێ چ كەی؟ من گۆتێ دێ مالا خوە ڤەگوهێزمە پشت جادێ گۆت سالح نە چە نە ترسە من گۆتێ دێ چم مە هێزا ڤی لەشكرێ مەزن نینە، و هەر وێ شەڤێ من مالا خوە و برایێ خوە ل دەوارا سوار كرن و ئەم دناڤ لەشكری ڕا چووینە پشت جادێ و مە مالێن خوە برنە (ئورە) و ئەم شەڤەكێ ماین و مە گۆت دێ تەماشە كەینێ دێ چ كاودانێن دونیایێ هێن و مە دیت ل هەمی دەڤەرا بۆ شەڕ و لەشكری ل هەمی عەردان هاڤێتە خەلكی، و ڤێجا وەك رۆژا دووماهیێ بوو و خەلك ب ئەوان چول و چیا كەفت و رەڤین و مە خوە گەهاندە ئاشیتێ و نێزیكی (20) رۆژا ئەم ماینە ل گوندێ( ئاشیتێ) و مە چەكێ خوە نەدانا و هەر كەسەكێ هەڤالەك هەبا ب هەر رێكەكێ شیابا چەكێ خوە ڤە گوهاست و خەلكێ باكورێ كوردستانێ هاتن بەراهی یا مە و دهەورا ڤی خەلكی هاتن و ئەوان رۆژان دا مە زانی دێ حوكمەتا توركا مە ڕادەستی ئیراقێ كەت، وی دەمی رۆژنامەڤان هاتن و دەنگ و رەنگێ خەلكێ مە گەهاندە دەرڤە و خەلكێ بیانی تەورا ڤی خەلكی هاتن و ئێدی حوكمەتا توركیا نەشیا وێ كریارێ بكەت، و ل بریارا خوە لێڤە بوو و حوكمەتا توركیا نەچار بوو بەرنامە و پلانەكێ بۆ ئەڤی خەلكی دروست بكەت و ئەم هاتینە رەوانەكرن بۆ كەمپا مێردینێ و ئەم سێ سالان ماینە ل كەمپا مێردینێ وی دەمی من بتنێ كورەك هەبوو ئەوێ شەهید بووی و كچەك ژی ل كەمپێ خودێ دامە مە ناڤێ وێ كرە (نازدار) نوكە شیكریە، ژیان ل كەمپێ گەلەك یا بزحمەت بوو، و مرادا مە گلاسەكێ ئاڤا تەزی بوو، و ئەو ئاڤا مە سەرێ خوە پێ دشیشت مە ئەو ئاڤ ڤەدخار و دورماندور مە كرە سیمە و نەهێلا ئەم دەركەڤین.
