لەشكەرێ توركیا رێیێن نوو ل دەڤەرا ئامێدیێ ڤە دكەت و خەلكێ دەڤەرێ یێ ب گومانە
ئامێدیێ مەحمود نهێلی
زێدەباری پرۆسەیا ئاشتیێ دناڤبەرا حكۆمەتا توركییا و گەریلایێن پەكەكێ دا و چەكدانانا هەژمارەكا چەكدارێن پەكەكێ ، لێ لەشكەرێ توركیا رۆژ بۆ رۆژێ یێ سەنگەرێن خوە موكوم دكەت و نوكە مژوولی ڤەكرن هەژمارەكا رێكێن دی یێ سەربازی یە ل دەڤەرا ئامێدیێ ب ڤێ یەكێ گومان ل جەم ولاتیان و خەلكێ دەڤەرێ دروست بوویە و دبێژن ئەڤە نیشانا مانا لەشكەرێ توركیایە بۆ دەمەكێ درێژتر.
ئاكنجیەكێ ناحیا دێرەلۆك بناڤێ كاروان دبێژیت ئەم چاڤەرێ بووین ئەڤ سالە ئەم ژی قەستا گوندێن خوە بكەین بۆ مەرەما چاندنێ و ئینانا دەرامەتی لێ دیارە لەشكەرێ توركیا نیەتا دەركەفتنێ ل ڤێ دەڤەرێ نینە و گۆت: زێدەباری پرۆسەیا ئاشتیێ و نەمانا چەكدارێن پەكەكێ ل دەڤەرا مە لێ دیارە لەشكەرێ توركیا ژنوو یێن رێیێن نوو ڤەدكەت و ئەڤە ژی نیشانا وێ یەكێ یە كو توركیا نیەتا مانێ هەیە ل ڤێ دەڤەرێ.
هاولاتیەكی دی یێ ناحیا شێلادزێ بناڤێ ستار بۆ رۆژناما ئەڤرۆ دیاركر، هاتنا لەشكەرێ توركیا بۆ سەر گوندێن وان رۆژانە گەلەك كارتێكرن ل خەلكێ دەڤەرێ كریە چ ژلایێ ئابوری ڤە چ ژی ژلایێ دەرونی ڤە و گۆت: ( بەری نوكە ئەم دشیاین بچینە سەر گوندێن خوە هەرچەندە ترس ژ بوردومانێ هەبوویە لێ پشتی هاتنا لەشكەرێ توركیا ئێدی ب چ رێكان ئەو نەشێن قەستا گوندێن خوە و چیایێ دەڤەرێ بكەن بۆ ئینانا بەرهەمێن خوە یێن چاندنێ .
نەزیر عەبدالله ئاكنجی یێ ناحیا دێرەلۆك دیار كر، ئەڤە هەیامەكە ئەو دبینن ل ناڤ گەلیێ رەشاڤە رێكێن نوو دهێنە ڤەكرن و رۆژانە دەنگێ تێ ئێن تی و ئامیرێن مەزن ل ناڤ گەلی دهێتە گوهلێ بوون و گۆت: راستی ژی ئەڤێ یەكێ گومان بۆ مە دروست كریە كو ئایا توركیا ب چ ئنیەت ڤان رێكان ڤە دكەت چونكە هەكە وان نیەتا چونێ هەبیت ئەو هندە جهێن خوە موكوم ناكەن و گۆت : هەكە ئەڤ لەشكەرە ل ناڤ گوندێن مە و دەڤەرێن مان ئەڤە دێ بیتە ئەگەرێ هندێ ئێدی ئەم نەشێن بچینە سەر گوندێن خوە و ئەو هیڤیا و ئومێدێن مە یێن جارەكی رێكا گوندا ڤە بن و ئەو هیڤی ژی مە نەمان.
هاتنا لەشكەری یا توركیا بۆ سەر دەڤەرا نێروە و رێكان و نهێلێ و بەرواریان ل سنوورێ دەڤەردارییا ئامێدێ زنجیرا چیایێ مەتینا ل سنورێ ناحیێن دێرەلۆك و شێلادزێ زیانێن زۆر
گەهاندینە خەلكێ ڤێ دەڤەرێ و ئەگەرێ مانا وان ژی ل ڤێ دەڤەرێ زێدەباری پرۆسەیا ئاشتیێ دێ زیانێن پتر گەهینیتە ولاتیان و ئەڤ یەكە ژی بوویە جهێ دلگرانیا خەلكی و وەلاتیان.
دهێتە زانین گەلیێ رەشاڤە كو نوكە رێیەكا نوو لێ دهێتە ڤەكرن كێمتر ژ دو كیلومەتران دوری سەنتەرێ ناوچەدارییا دێرەلۆكێ و هەروەسا چیایی مام رەشان و كورەژاری دكەڤیتە هنداڤا كومەلگەها سیریێ و سەنتەرێ ناوچەدارییا شێلادزێ ب دوراتیا 2 كیلومەتران و هەروەسا دەریێ سیڤا دكەڤیتە دەڤەرا نهێلێ ل هنداڤا گوندێ گوهەرز كو نكە ڤان هەموو جهان لەشكەرێ توركیا لێ هەینە.
