لەشکرێ تورکیا ھێرشی رۆژئاڤایێ کوردستانێ کر
ئەڤرۆ نیوز:
دەولەتا تورک ھێرشێن بنگەھێن یەپەگێ و ھێزێن سووریا دیمۆکراتیک دکەن و ل ھەرێما شەحبا د ناڤبەرا ھێزێن کوردی و ھێزێن دەولەتا تورک و کۆمێن چەکدارێن سەر ب تورکیا ڤە شەر و پێکدادانێن دژوار روو داینە و د ئەنجاما بۆمبەبارانا فرۆکێن تورکیا دا ١١ شەرڤانێن کورد ٩ وەلاتیێن سڤیل ژی جانێ خوە ژ دەست دان.
عەگید شەرڤان یەک ژ فەرماندارێ ھێزێن کوردی ل ھەرێما شەحبا د داخویانیەکی دا راگەھاند کو ھێزێن دەولەتا تورکیا ل دژی وان شەرەکی دژوار داینە دەستپێکرن و گۆت: (دەولەتا تورک ب فرۆکێن شەری و تۆپخانەیێن خوە ھەرێما شەحبا ب دژواری بۆمبەباران دکەت و د ئەنجاما ھێرشا ھۆڤانە یا دەولەتا تورک دا ١١ شەرڤانێن ھێزێن سووریا دیمۆکراتیک و نەە وەلاتیێن سڤیل جانێ خوە ژ دەست داینە و نەە وەلاتی و ١٩ شەرڤان ژی بریندار بووینە و ئەو یەک راگەھاندنا شەرەکی فەرمییە ل دژی مە و ئەم دێ ب دژواری بەرسڤا دەولەتا داگیرکەر یا تورک و چەتەیێن وان بدەین).
ناڤھاتی ھەروەسا راگەھاند ژی ھەر ل ھەرێما شەحبا ھێزێن وان بەرسڤا ھێرشا تورکا و کۆمێن سەر ب وان داینە و ب تەمامی ھێزێن وان ل دەڤەرێ شکاندینە و گۆت: (ھێزا مە یا بەرسڤدانێ ھەیە و ئەم ب دژواری بەرسڤا ھێرشا دەولەتا تورک و چەتێن وان ددەین و ل گوندێ شێخ عیسا مە نەە چەتێن وان و سێ سەربازێن تورک کوشتینە و دەڤەر ب تەمامی ل ژێر کۆنترۆلا مە دایە و ژ ئەڤرۆ پێڤە ئەم دێ بەرسڤا ھەر گوللەکا تورکان و چەتێن وان بدەین و ناھێلین ل رۆژئاڤایێ کوردستانێ و سووریێ بمینن).
فەرماندارێ ھێزێن سووریا دیمۆکراتیک ھەروەسا راگەھاند ژی ئەڤ دو رۆژن ھێزێن تورک ب فرۆکە و تانک و تۆپان و ساروخێن گراد ل گوندێن ئوم ئەل ھۆش، ئوم ئەل قورا و شێخ عیسا یێن گرێدایێ ھەرێما شەحبا ب دژواری ھێرشێن ھێزێن سووریا دیمۆکراتیک و وەلاتیێن سڤیل دکەن و گۆت: (بێدەنگیا ئەمریکا و روسیا ل ھەمبەر ھێرشێن دەولەتا تورک دھێتە واتەیا وێ یەکێ کو ئەو ھێرشێن تورکان قەبیل دکەن و ئەم ژی رادگەھینین کو ئێدی ئەم چاڤەرێی ھەڤکاری و ھاریکاریێن ئەمریکا و روسیا نینین و ئەم دێ بەرسڤا ھەر ھێرشەکا تورکان بدەین و تۆلا ھەر شەھیدەکی خوە راکەین).
ل ئالیێ دی ھێزێن دەولەتا تورک و کۆما چەکدارا تورکمان یا ب ناڤێ لیوا یا سولتان موراد ھێرشێ گوندێن عەزاز و عەفرینێ دکەن و ھێزێن کوردی ژی بەرسڤا ھێرشان ددەن و دەولەتا تورک نێزیکی ٥٠ تانکان ل سنورێ تورکیا ل گەل کانتۆنا عەفرینێ بجیە کرینە و بەردەوام کانتۆنا عەفرینێ بۆمبەباران دکەن و زیانێ گیانی و مادی ل کانتۆنا عەفرینێ دکەڤیت و ھەموو ھێزێن یەپەگێ و سووریا دیمۆکراتیک د ئامادە باشیێ دانە و کورد خوە بەرھەڤ دکەن کو ھێرشەکا دژوار ببەنە سەر کۆمێن چەکدارێن سەر ب تورکیا ڤە.
ل بەرەیێ باژێرکێ بابێ ژی ھێزێن کوردی شیان د ناڤا دو رۆژان دا چار گوندێن دی ژی ژ دەستێ داعشێ رزگار بکەن و خوە نێزیکی باژێرکێ بابێ بکەن و د رەوشا نھا دا ب تنێ ١٦ کیلۆمیتر ماینە کو ھێزێن کوردی خوە بگەھیننە ناڤەندا بابێ.
فەرماندارێ جڤاتا سەربازی یا بابێ د ڤێ مژارێ دا راگەھاند کو ئەو رۆژ ب رۆژێ خوە نێزیکی ناڤەندا بابێ دکەن و گۆت: (مە بەری نھا ژی دیار کریە کو ھەر ھێزەکا بخوازیت خوە نێزیکی بابێ بکەت ئەم دێ ب دژواری بەرسڤا وان بدەین و ب تایبەت ژی ھێزێن تورک و کۆمێن چەکدارێن سەر ب تورکان ڤە دڤێت خوە نێزیکی بابێ نەکەن، ھەکە خوە نێزیک بکەن ژ ئەڤرۆ پێڤە ئەم دێ ب دژواری ل ھەمبەر وان راوەستین و ئەو ھێزا مە ھەیە ئەم تورکان و کۆمێن تیرۆرست ژ دەڤەرێ دەرخینین).
