لەیلا زانا داخوازەکێ ژ سەرۆک کۆمارێ تورکیا دکەت
لەیلا زانا ئەنداما بەرێ یا پەرلەمانێ تورکیا دیار کر، سالا ٢٠١٣ سالەکا گەلەک گرنگ بوو و کارەک مەزن بۆ چارەسەرکرنا پرسا کورد ل تورکیا دهاتە کرن، لێ د ناڤ ئاکپارتیێ دا هندەک کەسان نەهێلان و قۆناغا ئاشتیێ ژناڤچوو و سەرۆک کۆمارێ تورکیا دشێت دەست ب قۆناغەکا نوو یا ئاشتیێ و چارەسەرکرنا پرسا کوردی ل تورکیا بکەت.
لەیلا زانا ئەنداما بەرێ یا پەرلەمانێ تورکیا د داخۆیانیەکێ دا بۆ رۆژناما دووار یا تورکیا دیار کر، سالا ٢٠١٣ خەباتەک گەلەک مەزن و باش ژ بۆ چارەسەرکرنا پرسا کوردی ل تورکیا هاتە کرن، لێ مخابن هندەک کەس د ناڤ ئاکپارتیێ دا و هەروەسا ل تورکیا دا رێ ل ئەردۆغانی گرتن وان دڤیا بێی ئەردۆغانی و ب رەنگەکێ دی پرسا کوردی چارەسەر بکەن، وان ب رەنگەکێ ئاشکرا دگۆت ئەم ناهێلین هوون وەسا ل گۆر خوە ڤێ پرسێ چارەسەر بکەن، چونکی دێ ئەنجامێن خوە یێن جودا هەبن و گۆت: (ب کورتی ئەز دشێم بێژم د ناڤ ئاکپارتیێ دا هندەک کەسان دڤیا بێی ئەردۆغانی پرسا کوردی چارەسەر بکەن و وان گەلەک ئاستەنگی دروست کرن، من نەڤێت نها ناڤێ وان کەسان بێژم لێ ئەو بوونە ئاستەنگ و ژ بەر ڤێ یەکێ ژی ئەردۆغانی نەخواست خوە بکەتە ژێر بارێ بەرپرسیاریەکا گەلەک مەزن و مەترسیدار، ژ بەر ڤێ یەکێ ژی قۆناغا ئاشتیێ وەسا ب ساناهی ژناڤچوو).
لەیلا زانا رەخنە ل سیاسەتا خەندەقان و شەرێ وی دەمی یێ ل باژێران ژی گرت و دیار کر، وی دەمی شاشیەک گەلەک مەزن هاتە کرن، شەرێ خەندەقان زیانەکا مەزن گەهاندە کوردان و ئەز ژ بەر ڤێ یەکێ ژی گەلەک توورە بووم، نها من خوە بێدەنگ کریە، چونکی ئەز ل هەمبەر گەلێ کورد ل تورکیا هەست ب شەرمزاریێ دکەم، پێدڤی بوو وی دەمی ئەو شاشی نەهاتبانە کرن، لێ مخابن ژ بەر ئەنجاما شاشیێن وی دەمی قۆناغا ئاشتیێ ب تەمامی ژناڤچوو و زیانێن گەلەک مەزن ژی گەهشتنە کوردان.
سیاسەتمەدارا ناڤدار یا کورد ئەو یەک ژی دیار کر، سەرۆک کۆمارێ تورکیا دشێت دەست ب قۆناغەکا نوو یا ئاشتیێ بکەت، ئەردۆغان باشتر ژ هەر کەسەکێ دزانیت کو دەم یێ هاتی ل تورکیا کار بۆ چارەسەرکرنا پرسا کوردی بهێتە کرن، ئەو باش دزانیت بێی چارەسەرکرنا پرسا کوردی قەیرانێن نها ل تورکیا دێ هەر بەردەوام بن و گۆت: (پێدڤیا تورکیا ب قۆناغەکا نوو یا هەی، سەرۆک کۆمار ئەردۆغان دشێت دەست ب قۆناغەکا نوو بۆ راگرتنا شەری و دەستپێکرنا ئاشتیێ و چارەسەرکرنا پرسا کوردی بکەت، تورکیا نەچارە پرسا کوردی چارەسەر بکەت، براستی ژی نها رەوش گەلەک خرابە و هەموو خەلکێن تورکیا ژ رەوشا نها رازی نینن، ژ بەر ڤێ یەکێ ئەز داخواز ژ سەرۆک کۆمارێ تورکیا رەجەب تەیب ئەردۆغانی دکەم دەست ب قۆناغەکا نوو یا ئاشتیێ و چارەسەرکرنا پرسا کوردی ل تورکیا بکەت).
