ل ئاكرێ دێ هەژمارەكا پرۆژەیێن ستراتیژی یێن وەبەرهێنانێ هێنە بجهئینان
رەمەزان زەكەریا
بۆ سالا 2024ێ چەندین پرۆژەیێن ستراتیژی د وراێ وەبەرهێنانێدا ل سنوورێ دەڤەرداریا ئاكرێ دێ هێنە بجهئینان، پشكەكا وان پرۆژەیان رازیبوون وەرگرتیە و ل نیزیكترین دەم دێ هێنە ڕاگەهاندن. دەڤەردارێ ئاكرێ ژی گۆت: نوكە كاركرن ل پرۆژەیێ ئاڤا ئاكرێ دا دهێتەكرن، كو د شیاندایە ب ڕێژەیا 90%ێ ئاریشەیا كێم ئاڤیێ ل ئاكرێ چارەسەربكەت، ئەڤ سالە سێ یاریگەهێن وەرزشی ل ئاكرێ و گردەسێن و دینارتە هاتینە نووژەنكرن و د قۆناغێن دووماهیێدانە.
د. دلاوەر بۆزۆ، دەڤەردارێ ئاكرێ گۆت: ئەڤ سالە پرۆژەیەكێ مەزنێ وەبەرهێنانێ كو چاندنا دارێن زەیتوونانە و دروستكرنا كارگەهەكا مەزن یا بەرهەمئینان روونی ل ئاكرێ دێ هێنە بجهئینان، پرۆژەیەكێ ب خودانكرنا چێلان ژی هەیە كو ل ناوچەداریا گردەسێن سنوورێ ئاكرێ هێتە بجهئینان، ل بجیل ژی پرۆژەیەكێ مەزنێ بخودانكرنا ماسییان هەیە.
ناڤبری گۆتژی: د وراێ گەشتیاری ژی دا پرۆژەیێن گرنگ هەنە ژ وان ژی دروستكرنا باژێرێ یاریێن ئاكرێ، كو نوكە دەست ل دروستكرنێ هاتییە كرن، پرۆژەیێ تلفریكا ئاكرێ ژی پرۆژەیەكێ گرنگ و ستراتیژییە و بریارە د ئەڤ سالە دا بهێتە بجهئینان.
دەڤەردارێ ئاكرێ زێدەتر گۆت: د وارێ ڕێك و پرادا پرۆژەیێن گرنگ هاتینە بجهئینان، قێركرنا ڕێكێن سەرەكییا ئاكرێ و بەرفرەهكرنا ڕێیا سەرێ گرێ، تونێلا پیرس كو سێ هزار میترە، پرۆژەیێن گرنگن و دێ هێنە بجهئینان.
ناڤهاتی خویاكر: نوكە كاركرن ل پرۆژەیێ ئاڤا ئاكرێ دا دهێتەكرن، كو د شیاندایە ب ڕێژەیا 90%ێ ئاریشەیا كێم ئاڤیێ ل ئاكرێ چارەسەربكەت، ئەڤ سالە سێ یاریگەهێن وەرزشی ل ئاكرێ و گردەسێن و دینارتە هاتینە نووژەنكرن و د قۆناغێن دووماهیێدانە.
