ل ئاكرێ پێشبینیا بەرهەمئینانا حەفت هزار تەنێن هژیرا دهێتە كرن
رەمەزان زەكەریا
ئەڤ سالە خواستەكا باش ل سەر بەرهەمێ هژیرا هەبوو، سەرەرای هندێ بەری وەرزێ پێگەهشتنێ هژیر تووشی نەخۆشیەكێ دبوون و د وەریان، بەلێ ئەڤ سالە خواستەكا باش ل سەر هەیە و كیلۆ دناڤبەرا 4 بۆ 7 هزار دیناران دا دهێتە فرۆتن.
تاهر سالح، جوتیارەكێ خودان باغێ هژیرایە بۆ ئەڤرۆ گۆت: هژیر دوو جۆر هەنە، هاڤینی و پایزی و بەرهەمێ ئەڤ سالە هژیر بەریا پێگەهشتنێ تووشی نەخۆشیەكێ دبوون، مە چەند دەرمان لێ رەشاندن مفا نەبوو، بەلێ ئەوا مایی گەلەك یا لاوە و خواستەكا باش ل سەر هەیە. ل بازاری هژیرا هاڤینێ گەلەك یا ب بهایە و وەلاتی ل دووڤ دگەریێن، ل پارێزگەهێن هەولێر دهێن بۆ كرینا هژیرا و ژیێ هژیرا هاڤینێ یێ كورتە، بەلێ هژیرا پایزی هەتا باران دبارن دمینیت و سەقا سار دبیت و زوو خراب نابن، سەرەرای خراببوونێ، بەلێ هەر یا ب بهایە و رێژەكا باش هەیە.
فازل مستەفا، ڕێڤەبەرێ چاندنا ئاكرێ بۆ ئەڤرۆ ڕاگەهاند: ل سنوورێ دەڤەرداریا ئاكرێ بەرهەمێ هژیرێ خواستەكا باش ل سەر هەیە و جوتیار سالانە بەرهەمێ زێدەتر دكەن، ئەڤ سالە بەریا وەرزێ پێگەهشتنێ تووشی كەفتنێ بوو، بەلێ ئەوا مایی گەلەك یا باشە و خواستەكا باش ل سەر هەیە بهایێ وێ ل دووڤ رێژا هژیرایە ل بازاری و ئەگەر بەرهەمێ زۆر بیت یا ئەرزانە و بەرهەمێ كێم بیت گرانترە، ب تایبەت ل دەستپێكا وەرزێ پێگەهشتنێ یا بهایە، پاشی دهێتە خوار، بەلێ هژیرا دەڤەرا ئاكرێ یا ب تام و رەنگ جوانە.
گۆت ژی: هژیر فێقیەكێ ساخلەم و مفادارە، د نوكە دا پتری 250 هزار دارێن هژیران ل ئاكرێ هەنە و پێشبینی دهێتەكرن د ئەڤ سالە دا بەرهەمێ هژیران بگەهیتە پتری 7 هزار تەنان، داخوازیەكا زۆر ل سەر هژیران هەیە و بەردەوام ئەڤ بەرهەمە بەرەڤ زێدەبوونێیە و پتر دهێتە چاندن، د پلانێدایە د سالێن داهاتی دا بەرهەمێ هژیران ب ڕێكێن باش و ساخلەم بهێتە هنارتن بۆ دەرڤەی هەرێما كوردستانێ.
