ل ئاكرێ چار تاوانبار هاتنە دەستەسەركرن
ئاكرێ، سەباح و رەمەزان:
موقەدم عیماد حسێن، پەیڤدارێ پۆلیسێن ئاكرێ د كۆنگرەكێ رۆژنامەڤانی دا دیار كر، د چەند رۆژێن بۆری دا ل سەر ئەنجامدانا هندەك تاوانێن جودا جودا ل سنوورێ دەڤەرداریا ئاكرێ پۆلیسێن ئاكرێ شیان چار تاوانباران دەستەسەر بكەن.
ناڤهاتی گۆت: «ژنەكێ 147 وەرەقێن دۆلاری یێن هەڤژینێ خوە برینە و رەڤیە پارێزگەها هەولێرێ، پشتی دووڤچوونا پۆلیسان ب رێكا كامیرێن چاڤدێریێ شیان وێ ژنا تاوانبار ب ناڤێ (ر. ك. أ) كو ژییێ وێ (28) سالن و خەلكا گوندێ خەلانەیە ل ناوچەداریا گردەسێن ل هۆتێلەكا هەولێرێ دەستەسەر بكەن، هەروەسا ئەو هەردو تاوانبارێن دی، كو دەست ل گەل ڤێ تاوانێ هەی و ڤیایی وێ ژنێ سەردا ببەن و پارا ژی وەربگرن، ئەو كەس هاتنە دەستەسەركرن و ب فەرمانا دادوەرێ ڤەكۆلینێ ل دووڤ بەندێ (453) ئەڤ هەردو تاوانبارە هاتینە دەستەسەركرن و ڤەكۆلین ل گەل وان یا بەردەوامە».
موقەدم عیماد ئاماژە دا وێ چەندێ ژی كو پشتی ل گوندێ گربیشێ یێ سەر ب ناوچەداریا دینارتە ڤە ل مەها ئێك یا ئەڤ سالە ل سەر كێشەكا جڤاكی دو كەس هاتینە كوشتن و تاوانبار بۆ جهەكێ نەدیار رەڤی، پشتی بۆرینا چەند مەهان شیان تاوانبارێ بناڤێ (ز. ح. أ) كو ژییێ وی (37)سالن و ب ئەنجامدانا وێ تاوانێ رابوویە دەستەسەر بكەن و چەكێ وی ژی دەستەسەركریە و دانپێدان ب تاوانا خوە كریە و كەیس بۆ دادگەها ڤەكۆلینێ هاتیە هنارتن.
