ل ئاكرێ گۆڕێن مریان بۆ ب ده‌ستڤه‌ئینا پارچێن شوونواری دهێنه كۆلان
ئاكرێ، ره‌مه‌زان زه‌كه‌ریا:
ل سنوورێ ده‌ڤه‌رداریا ئاكرێ چه‌ندین جاره ل جهێن جودا ژلایێ چه‌ندین كه‌سێن نه‌نیاسڤه گۆڕێن مریان ب مه‌ره‌ما ب ده‌ستڤه‌ئینانا پارچێن شوونواری یێن گرانبها دهێنه كۆلان.
هیوا شه‌مال، رێڤه‌به‌رێ شوونوارێن ئاكرێ بۆ ئه‌ڤرۆ گوت: “ژلایێ چه‌ندین كه‌سێن نه‌نیاسڤه بزاڤێن تێكدانا جهێن شوونواری ل سنوورێ ده‌ڤه‌رداریا ئاكرێ دهێنه‌دان و ئه‌ڤ دیارده‌یه نوكه گه‌له‌كا به‌ر به‌لاڤبووی ل ده‌ڤه‌رێ”.
گوتژی: “مه وه‌كو رێڤه‌به‌ریا شوونوارێن ئاكرێ ب نڤیساره‌كا فه‌رمی ده‌ڤه‌رداریا ئاكرێ و ده‌زگه‌هێن ئه‌منی ل سه‌ر ڤی كارێ ل هه‌مبه‌ر شوونواران دهێته كرن، ئاگه‌هداركرینه، بۆ وێ چه‌ندێ ب زووترین ده‌م ئه‌و كه‌سێن ب تێكدان و ده‌سكاریكرنا جهێن شوونواری رادبن، ل گور یاسا شوونواری سه‌ره‌رده‌ری د گه‌ل دا بهێته كرن”.
هیوای ئاشكرا ژی كر، ئه‌ڤه چه‌ندین جاره ل جهێن جودا یێن ده‌ڤه‌رێ كه‌سێن نه‌نیاس بزاڤا تێكدانا گورستان و جهێن شوونواری دكه‌ن و مه‌به‌ست ژی ژێ ب ده‌ستڤه‌ئینانا پارچێن شوونواری یێن گرانبه‌هایه.
