ل ئاكرێ بهایێ ئاژەلان ب رەنگەكێ بەرچاڤ داكەفتیە
رەمەزان زەكەریا
ژبەر نەهاتنا بارانا ل وەرزێ پێدڤی بۆ چاندنێ و گرانبوونا بهایێ ئالیك و كایا ئاژەلان بهایێ ئاژەلێن خۆمالی ب رەنگەكێ بەرچاڤ ئەرزان بوویە و ڤێ چەندێ ئاژەلدارێن دەڤەرێ تووشی دوو دلیێ كرینە ل كرین و فرۆتنێ.
عەلی حسێن ، دەلالێ كرین و فرۆتنا ئاژەلایە بۆ ئەڤرۆ گۆت : بەری چەندەكێ مەر ب 550 هزار دینارا بوون نوكە بهایێ وان داكەفتیە ب 400 تاكو 450 هزار دینارایە 100 هەتا 150 هزارا هاتیە خار بزن بەری نوكە ب 400 هزار دینارا بوو نوكە ب 250 هەتا 300 هزارایە.
سالح مستەفا ، ئاژەلدارەكێ دەڤەرا ئاكرێیە بۆ ئەڤرۆ گۆت: د نوكەدا هەر چ رۆژا پاشترە بۆ ئاژەلداران بازارێ وان لاوازترە ژبەركو رۆژ ب رۆژێ بهایێ مەر و بزن و گولك و چێلان ئەرزانتر دبیت، بهایێ ئێك چێل 500 هزار دینارا داكەفتیە و بهایێ ئێك گولك ژی 200 هەتا 400 هزار دینارا داكەفتیە.
سەعید محەمەد ، ئاژەلدارەكێ دن یێ دەڤەرێیە بۆ ئەڤرۆ گۆت: بەری فەترەكێ بزن ب 600 هزار دینار بوون نوكە ب 500 هزار دینارا ناهێتە فرۆتن رۆژ بۆ رۆژێ بهایێ وان دهێتە خار هەر چ رۆژا پاشترە ئەرزانترە و ئالیكا وان یا گرانە و بێ بارانییە لەورا كەس ناكریت، چێل بەری نوكە ب دوو ملیۆن و نیڤا دهاتە فرۆتن بەلێ نوكە ب ملیۆنەك و 800 هزار دینارا دهێنە فرۆتن گولك ئەگەر بەری نوكە ب ملیۆنەك و 200 هزار دینارا بیت نوكە ب ملیۆنەكێ دهێتە فرۆتن ئەڤە ژی هەمی بۆ كێما بارانایە و جوتێ تەلیسا كایێ چویە ب 7 هزار دینارا.
عەگید عەلی گوشتفرۆشەكێ ئاكرێیە بۆ ئەڤرۆ گۆت: بەری نوكە ئێك كیلۆیا گوشتێ زیندەوەران ب 7 هەتا 7250 دینارا بوو نوكە هاتیە شەش هزار و كێمتر ژی، گوشتێ نەرمە ئێك كیلۆ هاتیە ب 13500 دینارا و ئێك كیلۆیا گوشتێ هێسك ب 10 هزار دینارا دهێتە فرۆتن، بەری نوكە حەفتیێ هەموویێ مە دوو گولك ڤەدكوشتن، بەلێ نوكە رۆژانە گولكەك دهێتە فروتن.
