ل ئاكرێ بەرهەڤی بۆ پێشوازیكرن ل گەشتیارێن زڤستانێ دهێنە كرن
ئاكرێ، رەمەزان زەكەریا:
ل وەرزێ هاڤینا ئەڤ سالە رێژەكا بەرچاڤ یا گەشتیارێن ناڤخۆیی و بیانی سەردانا سنوورێ ئاكرێ كربوو، لەورا ژی هەر نوكە رێڤەبەریا گەشتوگوزارێ دەست ب بەرهەڤیانكریە بۆ پێشوازیكرن ل گەشتیارێن زڤستانێ.
ئەمین سەلیم، رێڤەبەرێ گەشتوگوزارا ئاكرێ بۆ ئەڤرۆ ئاشكرا كر، سروشت و جوانی و جهێن گەشتیاریێن ئاكرێ وەكریە، كو گەشتیارێن ناڤخۆیا كوردستانێ و ناڤەراست و باشوورێ ئیراقێ سەرەدانا ئاكرێ و هەموو هاڤینگەهـ و جهێن وێ یێن گەشتیاری بكەن و گۆت: «ئەو خالا سەرنجا مە ڕاكێشای ئەوە، كو هژمارەكا مەزن یا گەشتیاران ل ولاتێ ئەمریكا و كێشوەرێ ئەورۆپا ل دووڤ ناڤودەنگیا ئاكرێ سەرەدانا ڤێ دەڤەرێ كریە».
ناڤبری گۆتژی: «بۆ وەرزێ زڤستانێ مە هەماهەنگیەكا باش ل گەل گەشتیاران و جهێن گەشتیاری كریە بۆ ڕاكێشانا گەشتیاران د ڤی وەرزی دا، بەرهەڤیێن باش هاتینە كرن و جهێن زڤستانێ ژی بۆ گەشتیاران دابینكرینە، ل ئاكرێ دو جهێن گرنگ یێن گەشتیاری د وەرزێ زڤستانێ دا هەنە، ب تایبەت ل دەمێ بارینا بەفرێ، كو ئەو ژی چیایێ پیرس و سەرێ سادایە».
رێڤەبەرێ گەشتوگوزارا ئاكرێ زێدەتر گۆت: «مە گەلەك جاران داخواز ژ وەبەرهێنەر و جهێن فەرمی كریە بۆ چارەسەریا كێمایا جهێن مانەڤێ وەك ئۆتێل و مۆتێل، بەلێ بۆ ڤێ قووناغێ مە نڤیسینگەهەكا كرێیا خانیان ڤەكریە، هەر گەشتیارەكێ بڤێت بمینیت بلا سەرەدانا وێ نڤیسینگەهی بكەت و خانیەكی ب كرێ بگریت دێ ئاریشا ڤەحەواندنا وان چارەبیت».
