ل ئاكرێ و دێرەلۆكێ نەخۆشیەكێ پتر ژ 300 سەرێن پەزی كوشتینە
پەیامنێران، رەمەزان و مەحمود:
ل گوندێ خەردس یێ سەر ب دەڤەرداریا ئاكرێ ڤە و ل كۆمەلگەها هێتووتێ یا سەر ب ناوچەداریا دێرەلۆكێ ڤە ل سنوورێ دەڤەرداریا ئامێدیێ نەخۆشیەكا كوژەك د ناڤ ئاژەلان و پەزی دا بەلاڤبوویە و هەتا نوكە پتر ژ 300 سەرێن پەزی ژ ئەگەرێ وێ نەخوشیێ ل هەردو دەڤەران مرینە و هەتا نوكە چ دەرمان ژی بۆ نەهاتینە دیتن.
ئدریس عەلی، شڤانەكێ گوندێ خەردسە بۆ ئەڤرۆ گۆت: «هەتا نوكە نیشانێن وێ نەخۆشیا كوژەك د ناڤ پەزی دا ئەوە د وەرمن، مە چەندین دەرمان ب كارئیناینە، بەلێ مفا نەبووە و زەحمەتا مە یا چەندین سالان ب چەند رۆژان ژ ناڤچوو».
ئدریس گۆتژی: «ئەم دخوازین چارەسەریەكا بلەز بۆ بهێتە دیتن، ژ بەركو رەوشا پەزێ مە گەلەكا خرابە، دختۆر دبێژن: ئەڤ نەخۆشیە دلێ پەزی دگریت و زەعیف دبن و تشتی ناخۆن و پشتی دەركەفتنا چەند نیشانان و رۆژان ئێكسەر مرار دبن».
دیسا ژ ئەگەرێ بەلاڤبوونا نەخۆشیەكا ڤایرۆسی د ناڤ پەز و ئاژەلێن كۆمەلگەها هێتووتێ یا سەر ب ناچەدارییا دێرەلۆكێ ڤە د ڤان رۆژێن بۆری دا زێدەتر ژ 100 سەرێن پەزی و سپی مراربووینە، خودانێ ئێك ژ كەرێن پەزی ژی بۆ رۆژناما ئەڤرۆ دیار كر، پەزێ وی تووشی نەخۆەشیەكا ڤایرۆسی بوویە و گۆت: «پشتی چارەسەریێ نوكە رێژا مرنێ د ناڤ دا كێمبوویە».
