ل ئامێدیێ فیسته‌ڤالا ئێكێ یا گه‌شت و گوزاری هاته ئه‌نجامدان
ئامێدیێ، مه‌حمود نهێلی:
ل ژێر ناڤێ (به‌رڤ گه‌شت و گوزاره‌كا سه‌رده‌میانه) ب ئاماده‌بوونا كه‌سانێن شاره‌زا و ئه‌كادیمی و سه‌رمایه‌دار و به‌رپرسێن كارگێری یێن حكومه‌تا هه‌رێما كوردستانێ، زانكۆیا پولیته‌كنیك یا دهۆكێ ب هه‌ڤكاری ل گه‌ل رێڤه‌به‌ریا گشتی یا گه‌شت و گوزارا دهۆكێ دیدار و فیسته‌ڤالا ئێكێ یا گه‌شت و گوزاری یا قوبه‌هان ل ئامێدیێ ئه‌نجام دا.
د. هه‌كار زه‌كی، راگرێ په‌یمانگه‌ها ته‌كنیكی یا ئامێدێ بۆ رۆژناما ئه‌ڤرۆ گۆت: “مه‌ره‌م ژ ڤێ فیسته‌ڤالێ ئه‌و بوو، ئه‌م بۆ حكومه‌ت و سه‌رمایه‌دار و ئه‌كادیمیان دیار بكه‌ین، كو مه كه‌رته‌كێ گه‌له‌كێ گرنگ و چالاك یێ پشتگوهـ ئێخستی، كو ئه‌و ژی كه‌رتێ گه‌شت و گوزارێ یه، دوباره ئاڤاكرن و بنیاتنانا ڤی كه‌رتی ئه‌ركه‌كه نه ب تنێ ل سه‌ر ملێن حكومه‌تێ، به‌لكو ئه‌ڤ ئه‌ركه دكه‌ڤیته سه‌ر ملێن ئه‌كادیمی و سه‌رمایه‌داران ژی”.
گۆتژی: “په‌یمانگه‌ها ته‌كنیكی یا ئامێدیێ، تاكه په‌یمانگه‌هه ل زانكۆیا پولیته‌كنیك یا دهۆكێ كو پشكا گه‌شت و گوزارێ هه‌بیت، مه دیداره‌ك ده‌ست پێكر، داكو ئه‌م به‌رێ گه‌شتیاران بده‌ینه ده‌ڤه‌را ئامێدیێ بو وێ یه‌كێ خه‌لك بزانیت ئامێدیێ پایته‌ختێ گه‌شت و گوزارێ یه، لێ مخابن هه‌تا نوكه حكومه‌ت و كه‌رتێ تایبه‌ت و سازیێن ئه‌كادیمی نه‌شیاینه وه‌كو پێدڤی چاڤێ خوه بده‌نه ڤی كه‌رتی ل ده‌ڤه‌را مه”.
د. هه‌كار زێده‌تر گۆت: “مه وه‌كو سه‌رۆكاتیا زانكۆیێ، بڕیار دایه، دیدارا قوبه‌هان سالانه بهێته ئه‌نجامدان، داكو بشێین به‌رێ سه‌رمایه‌داران و كه‌سانێن ئه‌كادیمی و حكومه‌تێ ژی بده‌ینه ڤێ ده‌ڤه‌رێ بۆ پێشڤه‌برنا كه‌رتێ گه‌شت و گوزاری”.
