ل ئامێدیێ بازارێ بەرھەمێ خۆمالی د زڤستانێ دا یێ گەرمە
ئامێدیێ، ئەسعەد رێکانی:
دلوڤان ئامێدی فروشیارێ بەرھەمێن خومالی ل ئامێدیێ دیار کر کو بەرھەمێ خومالی یێ کێمە و ب بھایەکێ گران دگەھیتە بەردەستێ وان و گۆت: راستە د زڤستانێ دا داخوازیەکا زۆر یا ل سەر بەرھەمێن خوارنێ یێن خومالی ھەی و بازارێ گەرمە، بەلێ بەرھەم یێ کێمە ب بھایەکێ گران دگەھیتە بەر دەستێ مە و داخازی یا ل سەر ھەی وەک کتک و مێویژ و گویز و باھیڤ و بێمک و کەزان و ھنگڤین و دوشاڤا تری و شاپڕمان و سھکا کوردی و خەلک پتر حە ز ژ ڤان جۆرە خوارنا دکەت، چونکو بەرھەمەکێ سروشتی یە.
عسمەت بەنستانی فروشیارێ ھنگڤینی ل شێلادزێ گۆت: دەمێ ھنگڤین ھاتیە بەرھەم ل پیازێ، گەلەک ھنگڤین ھاتە فروتن ول ھەمی دەڤەرا ژی دھاتن و داخازی ل سەر ھەبوو، لێ ھەر کەسەکێ ژی ل دووڤ داخازیا خوە ھنگڤین دکری.
نەشوان رێکانی فروشیارێ بەرھەمێن خۆمالی ل سیریێ گۆت: ل دەڤەرا مە بەرھەمێ پایزی و زفستانێ یێ چیایی تایبەتی بێمک و کەزان د ئەڤ سالە دا یێ زۆر بوو و ژبەر کاودانێن دارایی ژی خەلکەکێ ژ نەچاری قەستا چیای دکر بۆ کۆمکرنا بەرھەمی و پاشی دئینا بازاری دفروتن و چێ دبیت ھەر دکاندارەکێ نێزیکی دوو تا سێ ھزار کێلویێن کەزان و بێمکا کریبن و ئەم ژی رێژەکا باش یا گیز و گەزان و ھنگڤین و تەحینا خومالی کەشک و ژاژی دفروشین، چونکو د زڤستانێ دا گەرم و گوریەک دکەڤیتە بازاری دا.
