ل ئامێدیێ سالڤەگەڕا سێدارەدانا چار ئەفسەرێن كورد هاتە ساخكرن
ئامێدیێ، مەحمود نهێلی:
ب بەرهەڤبوونا بەرەڤان حەمدی، بەرپرسێ لقێ 18 یێ پارتی و وارشین سەلمان، دەڤەردارێ ئامێدیێ و هەژمارەكا زۆرا بەرپرسێن حزبی و حكومی و خەلكێ دەڤەرێ و كەسوكارێن شەهید عزەت عەبدولعەزیز و ب هەلكەفتا بۆرینا 76 سالان ل سەر سێدارەدانا چار ئەفسەرێن كورد ژ لایێ رژێما ئیراقێ یا وی سەردەمی ڤە دوهی 19/6/2023 ل بەردەم پەریكەرێ شەهید عزت عەبدولعەزیز ل ئامێدیێ رێورەسمەك هاتە سازكرن.
بەرەڤان حەمدی، بەرپرسێ لقێ 18 یێ پارتی د پەیڤەكێ دا گۆت: «ئەم ئەڤرۆ دێ دو بیرەوەریێن گرنگ ساخ كەین، ئێك: بیرەوەریا دەربازبوونا بارزانییێ نەمر ل گەل 503 پێشمەگەریان ژ رووبارێ ئاراس، دو: بیرەوەریا سێدارەدانا چار ئەفسەرێن كورد ژ لایێ رژێما ئیراقێ ڤە، وان چار ئەفسەران ژیانا خوە كریە قوربانی گەل و وەلاتێ خوە».
محەمەد موحسن پەیڤا بنەمالا شەهید عزەت عەبدولعەزیز پێشكیش كر و دیار كر، ئەو خوە سەربلند دبینن وەك خەلكێ دەڤەرا ئامێدیێ، كو هەر ل دەستپێكا شۆڕەشا شێخ عەبدولسەلام بارزانی و شۆڕەشێن دی پشكدار بووینە و گۆت: «ل سالا 1945 خەلكێ ڤێ دەڤەرێ پتر ژ 500 كەسان پەیوەندیی ب بارزانیێ نەمر كر، ژ وانا چار ئەڤ ئەفسەرێن كورد بووینە و ئێك ژ وانا خەلكێ دەڤەرا ئامێدیێ یە».
محەمەد موحسن داخواز كر، خوینا شەهیدان و زەحمەت و قوربانیدانا خەلكێ ڤێ دەڤەرێ ب هەروە نەچیت و گوهداریا پەیڤێن تەیسوك نەهێتە كرن و قەوارێ هەرێمێ بهێتە پاراستن، دیسا داخواز كر كو گرنگی ب ڤێ دەڤەرێ بهێتەدان، كارگەه و كۆمپانی بهێنە دانان و گرنگی ب ژێرخانا ئابووری یا دەڤەرێ بهێتە كرن و دەلیڤێن كاری پتر بۆ خەلكێ ڤێ دەڤەرێ بهێنە پەیداكرن.
دهێتە زانین پشتی ژناڤچوونا كۆمارا كوردستان ل مهاباد، چار ئەفسەرێن كورد بناڤێن (عزەت عەبدولعەزیز، مستەفا خوشناو، خیرالله عەبدولكەریم و محەمەد مەحمود قودسی) ل گەل هەژمارەكا دی یا پێشمەرگەیان ل سالا 1947 خوە رادەستی حوكمەتا ئیراقێ یا وی دەمی كربوو و ژ لایێ رژێما ئیراقێ ڤە هاتنە سێدارەدان و شەهیدكرن.
