ل ئیرانێ بەرهەڤی بۆ هەلبژارتنا سەرۆک کۆماری دهێنە کرن
پشتی مرنا ئیبراهیم رەئیسی سەرۆک کۆمارێ ئیرانێ ل گۆر قانوونا بنگەهین یا ئیرانێ دڤێت د دەمێ ٥٠ رۆژان دا سەرۆک کۆمارەک نوو بهێتە هەلبژارتن و هەتا نها ١٧ کەسان خوە بۆ پۆستێ سەرۆک کۆمارێ بەربژار کرینە کو د ناڤ وان کەسان دا مەحمود ئەحمەدی نەژاد سەرۆک کۆمارێ بەرێ یێ ئیرانێ، سەعید جەلیلی شیرەتکارێ جڤاتا ئاسایشا نەتەوەیی یا ئیرانێ و هەروەسا عەلی لاریجانی سەرۆکێ بەرێ یێ پەرلەمانێ ئیرانێ هەنە.
ل گۆر قانوونا بنگەهین یا ئیرانێ پشتی داخوازی دهێنە پێشکێش کرن دڤێت ژ ئالیێ جڤاتەکا تایبەت ڤە دووڤچوونا دۆسیا وان کەسان بهێتە کرن و دبیت داخوازیا هندەک ژ وان کەسان بهێتە رەتکرن.
چاڤدێرێن سیاسی ژی دیار دکەن، پشتی مرنا سەرۆک کۆمارێ ئیرانێ دێ سەرۆک کۆمارەک نوو هێتە هەلبژارتن و ئەو یەک چو کاریگەریا خوە ل سەر رەوشا ناڤخوەیی و سیاسەتا دەرڤە یا ئیرانێ نابیت، چونکی سیاسەتا دەرڤە و ناڤخوەیی یا ئیرانێ ژ ئالیێ رێبەرێ شورەشا ئیسلامی یا ئیرانێ ڤە دهێتە دیار کرن و سەرۆک کۆمار تنێ وەکو رێڤەبەرەکێ کار دکەت.
