ل ئەنفالا سالا 1988ێ ئەم پێنج كەس ل چیایێ مەتینی مابووین
رەمەزان دەشتمری، زاخۆ
ل سێدەهییا ڕوژا ١٩٨٨/٨/٢٥ی حكومەتا ئیراقێ ب فڕوكەیێن جەنگی دەڤەرێن ڕزگاركری ئەوێن دبن كونترولا پێشمەرگەی دا كێمیا بارانكرن، و د ئەگەرا ڤێ كێمیا بارانكرنێ دا زەرەر و زیانێن گیانی و مادی گەهشتنە وی خەلكی د ناڤ شوڕەشێ دا ماین.
نەخاسمە كێمیا بارانكرنا بارەگایێ ڕێكخراوا گوڤەند یا پێشمەرگەیی ل گوندێ تویكا و د ئەگەرێ دا چواردە پێشمەرگە شەهید بوون، لەزگین حەجی حسێن دەشتمری ئێك ژ وان پێشمەرگەیێن بەر ب هەوا ئەنفالا كەفتی و چەوا شیا خوە قورتال بكەن، و خوە ب گەهینن سەر سنوری.
پێشمەرگەیێ گولانێ لەزگین حەجی حسێن دەشتمری گۆت: وی دەمی ئەز ل سنورێ لیژنا ناوچا دهوكێ پێشمەرگە بووم، و مالا مە ل گوندێ باجلێ بوو. ل وێ هاڤینێ مە مالێن خوە ئینا بوون بەر لێڤا رویبارێ خابیری، ل سپێدەهییا روژا ١٩٨٨/٨/٢٥ێ فڕوكەیێن حكومەتا ئیراڤێ گوندێ تویكا و گوندێ برجینی و گوندێ دێریشكێ و گەلەك دەڤەر و جهێن دیتر كێمیا بارانكرن، و خەلكێ دەست ب مالباركرنێ كر.
لەزگین حەجی حسێن دەشتمری خوەیاكر، مە وەك خەلكێ گوندێ باجلێ وەكی هەمی گوندێن دیتر بو گوندێ بارهولێ و گوندێ غولدیا چوین، و ب شەڤێ ل گوندێ غولدیا ماین و ل ڕوژا دیتر بەر ب گوندێ كەلها شێخو و گوندێ بازێ و بێلیزانێ چوین و ل دەمێ شەڤێ گەهشتین گوندێ گركا بەرواریا و ژبەر كو لەشكرێ حكومەتا ئیراقێ هات بوو و جادا گشتی كونترولكربی مە نەشیا زاڕۆك و خێزانێن خوە ل جادا گشتی دەرباز بكەین، ئەم نەچار بووین پاشڤە بزڤڕین، ل سپێدەهییا ڕۆژا ١٩٨٨/٨/٢٨ێ زێدەتر ژ هزار و پێنچ سەد كەسان هاتین، بو دەرێ گەلیێ دهێ و حكومەتا ئیراقێ ب لەشكر و جاشان ڤە بەراهیكا وی خەلكی گرتن و خەلك نەچار بین خۆە تەسلیم بكەن، ل وی دەمی مە پێنج كەسان ئەوژی( لزگین حەجی حسین، ئەحمەد سادق خالد، حسین محمد شهباز، ئەحمەد محمد شهباز، تەیار محمد شهباز) مە بڕیار دا كو خێزان و زاڕۆكێن خۆە تەسلیمی حكومەتا ئیراقێ بكەین، و ئەم زەلام ل دەڤەرێ بمینن و خۆە تەسلیم نەكەین و ب تنێ چیایی هەلبژێرن، ئەم بو سەری چیایێ مەتینی هاتین و حكومەتا ئیراقێ ب لەشكر و جاش و فڕوكێن هەلیكوپتەر ڤە هێرشی دەڤەرێ كرن، و مالێ خەلكی تالانكرن و گوند سۆتن، تێهنی و برسی و وەستیایی ئەم ل هنداڤی گوندێ پاسێ هەتا ئێڤاری ل چیایی ماین.
پێشمەرگەیێ گۆلانێ هەروەسا گۆت: ل دەمێ ڕۆژ ئاڤایێ مە بڕیاردا ئەم بێن بو ناڤ گوندێ پاسێ بوخوە هندەك نانی پەیدا بكەین و جارەكا دیتر ڤەگرین چیایێ مەتینی خوە هەشار بدەین، ل دەمێ ئەم هاتین و مە قەستا گوندی كری ل تەنشتا گوندی مە خودێ ژێ ڕازی ئوسمانێ خالدێ كەبەروكی دگەل هەژمارەك ژ پێشمەرگە و كەس و كارێن وی دیتن، كو ئەوان ژی خوە تەسلیمی حكومەتا ئیراقێ نەكر بوون. گوندێ پاسێ ژی هات بوو چولكرن، و كەس ژ خەلكێ گوندی لێ نەمابوون، وێ شەڤێ ئەم ل ناڤ گوندی گەرییان ب هەر حالێ هەیی هندەك نانێ ترسی مە بو خوە پەیداكر، و جارەكا دیتر ل سپێدێ مە قەستا چیایێ مەتینی كر و ب ڕۆژێ مە خوە لێ هەشاردا.
پێشمەرگەیێ ناڤبری دیسا دیاركر، ل دەمژمێر دوازدەێ نیڤرۆ حكومەتا عیراقێ ب لەشكر و جاشان ڤە هیرشی دەڤەرێ كرن، و گوند بو گوندی سۆتن و تالانكرن و گوندێ پاسێ ژی سۆتن، ل دەمێ بوویە شەڤ هەڤالان بڕیاردان ئەم ژ چیایێ مەتینێ بۆ دەڤەرا بەر خابیرێ بهێن، ژ بەر كو گوندێن دەڤەرێ هەمی هاتنە سۆتن و لەشكر و فەوجێن جاشان ل دەڤەرێ بەلاڤە بوون، ئەم ژ گوندێ پاسێ بو گوندێ دوكەرێ و گوندێ بالەكا و گوند كوسەیی هاتین، گەهشتین گوندێ باجلێ دنیا ل مە بوو ڕۆژ، و ئەم نەچار بوین ل ناڤبەرا گوندێ باجلێ و گوندێ گوند كوسەیی ل ناڤ وان شوڕك و نهال و دار قاچان مە خوە دا هەشارێ هەتا دونیا بویە شەڤ، و جارەكا دیتر ئەم هاتین و مەڕێك شەقاند و گەهشتینە گوندێ تیركێ، و ل شەڤێ مە نەشیا ل جادا گشتی دەرباز بین و مە خوەگرت هەتا شەڤا دیڤدا ل ڕاستا گوندێ گرك سندی ئەم ل جادا گشتی دەرباز بوین، بۆ گوندێ هەورێزێ چوین و ل جهەكێ دبێژنێ تەنگا خەرزێ را بو ناڤ ئاخا توركیا چوین.
ل دووماهیێ پێشمەرگەیی گولانێ گۆت: پاشی حكومەتا توركیا چەكێن مە ژمە وەرگرتن و ئینان بۆ چادرگەها باژێڕێ سلۆپیا و ژ چادرگەها سلۆپیا بۆ كەمپا باژێڕێ مێردینێ ڤەگوهاستین و زاڕوك و خێزانێن مەژی ل گەلیێ گوندێ دیهێ كەفتن دناڤ دەستێن حكومەتا ئیراقێ دا و پشتی ل كەلها نزاركێ و هولێن سەلامیێ هاتینە زیندانكرن، ئەوژی بۆ ناڤ ستری مشكێن دەشتا هەولێرێ ل جەژنیكان ئاكنجی كرن، ئەڤەژی ئێك ژ چیروكێن ئەنفالا ڕەش یا سالا ١٩٨٨ی ئەو خەلكێ خوەڕاگر ئەڤێن ل ناڤ شۆرەشێ دا ماین ب سەرێ وان هاتین.
