ل بن سەیوانا 688
غیاس خـالد زێباری
ب درێژاهیا دیرۆكێ دەستهەلاتدارێن رژێمێن ئیراقێ هەرێما كوردستانێ و خەلكێ وێ ب بەشەكێ ئاخ و خەلكێ ئیراقێ هژمار نەكرینە و هەردەم ب تۆندترین شێوە و دوور ژ رەفتارێن مرۆڤایەتیێ سەرەدەی ل گەل شۆرەش و بزاڤێن نەتەوی و نشتیمانیێن یێن كوردستانی كریە، ژ وێرانكرنا گۆندا و ڤەگۆهاستن و ب عەرەبكرنێ تا گەهشتە ئاستێ هەوێن جینۆساید و ئەنفالان ل سەردەمێ رژێما بەعسا ژ ناڤچوویی ل سالێن هەشتێیێن سەدێ بووری و سازیێن نیڤدەولەتی و وەلاتێن جیهانێ ژ بەر بەرژەوەندان ل سەر وان تاوانێن بەرامبەر گەلێ كورد بێ دەنگ مان . لێ نەشیان هیڤیێن خەلكێ كوردستانێ بۆ ئازادی و رزگاریێن ب كۆژن و دەستێن وان ل خەباتێ بەردەن، ئەو بوو ل بوهارا سالا 1991 گەلێ كورد سەرهەلدانەكا سەرتاسەری بەرپاكر و پڕانیا باشوورێ كوردستانێ هاتە رزگاركرن، ئەڤ سەرهەڵدانە و رزگاریە و شكەستنا وێ وێنە یا لەشكرێ رژێما ئیراقێ، بوویە ئەگەرێ تۆڕەبوونەكا زێدەتر یا رژێما بەعس و هەمی شیانێن خوە یێن لەشكری ئینانە كوردستانێ ژبووی ڤەمراندنا چریسكا سەرهەڵدانێ، لێ ڤێ جارێ دیمەنێن مشەختبوونا مەلیوونی هش و هۆشێن جیهانێ لڤاندن و ل سەر زۆڵم و زۆرداریا دژی كوردستانێ هاتنە دەنگ و ل رۆژا 5/4/1991 جڤاتا ئاسایشا نیڤدەولەتی بریارا 688 دەركر بۆ پارێزبەندیا باشوورێ كوردستانێ هێلا 36 یا دژە فرین دیاركر، لرۆژا 19/4/1991 ئەڤ بریارا جڤاتا ئاسایشێ یا ب پشتگیریا ئەمریكا و فەرەنسا كەفتە وارێ بجهئینانێ، ژبلی پاراستنا گەلێ كورد ل دووبارنەبوونەڤا ئەنفال و جینۆسایدكرنێ و وێرانكرنێ ، بڤێ بریارێ پرسا گەلێ كورد ل پرسەكا ناڤخوەیی كرە پرسەكا نیڤدەولەتی و جیهانی و قەوارێ هەرێما كوردستانێ ژ ئەنجامێ وێ بریارا نیڤدەولتی هاتە هەبوونێ، نابیت گەلێ كورد و سەركردێن كوردستانێ رۆلێ فەرەنسا ب گشتی و مەدام دانیا میتران هەڤژینا سەرۆكێ كۆچكری دانیال میتران كۆ ب دایكا كوردا دهێتە نیاسین بۆ دەركرنا بریارا دیرۆكیا 688 یا جڤاتا ئاسایشێ چ جار بهێتە ژبیركرن، چونكی ب هەوڵ و كڤاشێن وێ هاتە دەركرن، دشێن بێژین ئازادی و پێشڤەچۆنێن ئەڤرۆ ل هەرێما كوردستانێ ژ ئەنجامێ ڤەدانا سەیوانا 688 یا جڤاتا ئاسایشێ بوو بۆ گەلێ كورد، بن سێبەرا وێ سەیدانێ قەوارێ هەرێما كوردستانێ پارێزبەندیەكا نیڤدەولەتی پەیدا كر و ب لێزانی و دووربینا سیاسەتا سەركردێن كوردستانێ ب تایبەت سەرۆك مەسعود بارزانی دەرگەهێن ل گەل جیهانێ هاتنە ڤەكرن و ئەڤرۆ هەرێما كوردستانێ بوویە ئەكتەرەكێ گرنگ ل گۆهڕین و ئارامی و سەقامگیریێ ل دەڤەرێ.
