ل به‌رده‌ره‌ش رێژه‌یه‌كا زۆر یا برنجی دهێته به‌رهه‌مئینان
به‌رده‌ره‌ش، گوهدار سلێمان:
د نوكه دا وه‌رزێ چاندنا به‌رهه‌مێ برنجیه كو ل هه‌می ده‌ڤه‌ران ده‌ست ب چاندنا به‌رهه‌می هاتیه‌كرن و سالانه ڕێژه‌كا زۆر ل هه‌رێمێ به‌رهه‌م دهێت، ڤێ ڕێژێ هه‌تا راده‌یه‌كێ شیایه پێدڤیێن خه‌لكی ب برنجێ كوردی ل هه‌رێمێ ب گشتی پربكه‌ت.
مه‌هدی حوسه‌ین ئێك ژ جۆتیارێن ده‌ڤه‌رێ یه كو ئه‌ڤ ساله دا ڕێژه‌كا باشا به‌رهه‌مێ برنجی كریه دده‌ته دیار كرن، ده‌ڤه‌را مه د ڤان سالێن دووماهیێ دا پتر ده‌ست ب كرنا به‌روبومێن چاندنێ كریه و تایبه‌ت كرنا برنجێ كوردی كو سالانه رێژه‌كا زۆر دهێته چاندن و سال بۆ سال رێژا وێ پتر دبیت سه‌ره‌رایێ هندێ كو سالانه بهایێ خوه ژ ده‌ست دده‌ت، ل ڤان دووماهیان بریاره‌كا هه‌رێمێ ئه‌م جۆتیار دلته‌نگ كرین كو ڤیابا به‌رهه‌مێ برنجی نه‌هێته كرن، لێ خۆشبه‌ختانه ئه‌و بریار جێ به جێ نه‌بوو، چونكی زه‌ره‌ر و زیانه‌كه گه‌له‌ك مه‌زن دا ل به‌ر مه جوتیاران كه‌ڤیت، ل پایزێ ئه‌م زه‌ڤیێن برنجی ب كرێ دگرین پاره دده‌ین و زه‌ڤی ده‌ست هه‌می كه‌سا ژی ناكه‌ڤیت هندی داخوازی ل سه‌ره.
مێڤان میرخان جۆتیاره‌كێ دی یێ ده‌ڤه‌رێ یه دبێژیت: به‌ری چه‌ند رۆژه‌كه مه ده‌ست ب چاندنا برنجی كریه كو ئه‌و ژی مه برنجێ شه‌ش مه‌هی و عه‌مبه‌ر چاندینه و نوكه ده‌مێ چاندنا برنجێ ته‌حالفه، هه‌ر سال ده‌شتا ده‌ڤه‌رێ تژی به‌رهه‌مێ برنج دبیت و به‌رهه‌مه‌كێ باش لێ دهێت، به‌لێ ڕه‌نج و زه‌حمه‌ته‌كا مه‌زن ئه‌م دبه‌ین هه‌تا برنج بگه‌هیت، بازارێ برنجی وه‌ك به‌رێ بهایێ خوه نینه و بهایێ وێ سالانه ئه‌رزانتر دبیت، زێده‌تر ژی گۆت: جهێ داخێ یه حوكمه‌تا هه‌رێمێ گرنگیێ ب كه‌رتێ چاندن و به‌رهه‌مێ ناڤخوی ناده‌ت.
سه‌لیم ده‌رۆێش شاره‌زا د بوارێ چاندنێ دا دده‌ته دیار كرن: د ئه‌ڤ ساله دا سه‌ره‌رای هه‌بوونا مه‌ترسیا هشكه‌سالیێ ل ده‌ڤه‌را به‌رده‌ره‌ش زێده‌تر سێ هزار دونه‌مێن برنجێ كوردی دێ به‌رهه‌م هێن، ئه‌ڤه ژی ڕێژه‌كا گه‌له‌ك باشه ل سه‌ر ئاستێ قه‌زایێن هه‌رێمێ، ب ڤێ ڕێژێ هه‌تا ڕاده‌یه‌كێ شیایه پێدڤیێن خه‌لكی ب برنجێ كوردی ل ده‌ڤه‌رێ پر بكه‌ته ڤه، ئه‌ڤ برنجه سالانه ل ناڤخویا به‌رده‌ره‌ش دهێته فروتن و هه‌روه‌سا بۆ پارێزگه‌هێن ناڤه‌ڕاست و ژووریا عیراقێ و هه‌تا بۆ ده‌رڤه‌ی وه‌لاتێ ژی دهێته هنارتن، ده‌شتا ناڤ كورێ ده‌شته‌كا ب پیت و به‌ره‌كه‌ت و پری به‌رهه‌مێ ناڤخویه، دڤێت حوكمه‌تا هه‌رێمێ گرنگیه‌كا پتر بده‌ته كه‌رتی َچاندنێ ل ڤێ ده‌ڤه‌رێ.
