ل به‌ندا سه‌یدایێ (خورشید) و خانما (سۆزان) و هۆزانێن دلته‌ر
عه‌بدولره‌حمان بامه‌رنى
هه‌ر كه‌سه‌كى تشته‌ك پێخوه‌شه و تشتێ زێده‌تر من مژوول دكه‌ت، داهێنانه و ئه‌ڤ كه‌سێن حه‌ز دكه‌ن ژیانێ جوانتر لێبكه‌ن یان تشتان جوان ببینن و كه‌سێن ده‌وروبه‌رى خوه ژى، پشكدارى وێ جوانیێ دكه‌ن. ژبه‌ركو ژى پرانیا ده‌مێ خوه ئه‌ز بۆ خواندنێ ته‌رخان دكه‌م، چه‌ند ده‌مژمێرێن من ل پشت لاپتوپى دچن و تشتێ ل ڤێ دووماهیێ سه‌رنجا من راكێشاى، دو به‌رێزن، دو هۆزانڤانن و ئه‌و تشتێ ئه‌و دنڤیسین، نڤیسینێن ته‌ر و نازك و خوه‌شن، هه‌ر كه‌س حه‌ز دكه‌ت بخوینیت و ژ خواندنێ ژى زێده‌تر، مه‌ره‌ق دكه‌ن تشته‌كێ وان یێ دى بخوینن، تایبه‌ت ئه‌ڤێن پشكه‌ك ژ ژیانا گوندا و ئاقارى دیتى و ئه‌ڤێن حه‌ز دكه‌ن، د ژیانا ساده‌ییا كورده‌واری دا شاره‌زا ببن. یا راستى بیت، ل ده‌ستپێكێ ئه‌ز ژ خواندنا وان هۆزانان ب گومان كه‌فتم، ئه‌گه‌ر من سه‌یدایێ (خورشید) ژ نێزیك ناس نه‌كربایه! ره‌نگه گومان ل ده‌ف من دروستبایه، ب ره‌نگه‌كى یان ئه‌ڤ كچا ب ناڤێ (سۆزان) ژ خه‌یالا وى بخوه یه و یان ژى، ب راستى خورشید یێ عاشق بووى و عاشقبوونا قۆناغا دویێ و ره‌نگه قۆناغا سیێ بیت، هه‌كه ئه‌م پشتى ته‌مه‌نێ چل سالیێ، ب قۆناغا دویێ یا عاشقبوونێ ل ده‌ف گشت زه‌لامان دانین، هه‌ر چاوا بیت، نڤیسین و داهێنان ته‌مه‌نى ناس ناكه‌ن، تشتێ جوان و نڤیسینێن جوان هه‌ر دجوانن، خوه ل كیڤه بن و كى وان بنڤیسیت. تشتێ ئه‌ز پالدایمه ڤێ نڤیسینێ ژى، ئێك: مافێ هه‌ر كه‌سى هه‌یه، ده‌ما ئه‌و تشته‌كێ جوان بنڤیسیت و بلاڤ بكه‌ت، هنده‌ك هه‌بن ره‌خنێ لێبگرن و جوانییا وى سه‌راڤ بكه‌ن و ئه‌گه‌ر كێماسى ژى هه‌بن، بۆ راستڤه‌كه‌ن، ئاخر هه‌ر هۆسایه ژى، هه‌كه مه بڤێت ئه‌م به‌هره‌مه‌ندان دروست بكه‌ین، دڤێت رێ ل به‌ر وان ڤه‌وژێرین. دو: ژبه‌ركو ئه‌و هۆزانێن خوه ل تۆرێن جڤاكى به‌لاڤ دكه‌ن، ژ ئه‌ڤا ل سه‌رى من ئاماژه بۆ داى، كۆمێنت بۆ دهێنه نڤیسین و باوه‌ردكه‌م تێبینى ژى بۆ دچن، لێ من دڤێت ب دیتنه‌كا ئه‌ده‌بى یا سه‌رپێ ئاڤریه‌كێ لێبده‌م، ئاخر ژى دڤێت كه‌سه‌ك هه‌بیت هه‌لسه‌نگاندنا وان به‌رهه‌مان بكه‌ت، یێن دهێنه بلاڤكرن و دكه‌ڤنه به‌رچاڤێن خه‌لكى. هۆزانا مللى هۆزانا مللى بكورتى ئه‌و ره‌نگێ هۆزانێ یه، كو په‌یڤ و ناڤه‌رۆكا وێ ده‌ربرینێ ژ وى جڤاكى دكه‌ت، ئه‌ڤێن هۆزانڤان د ناڤ دا دژین و شێوێ لێكئینانا ڤان هۆزانان ژى، ئه‌و په‌یڤن یێن نزیكى شێوه‌زارێ ویێ ئاخفتنێ و پرانیا جاران ژى، وان بابه‌تان د ئازرینن، یێن د چارچووڤێ ئاینى یان وه‌سفى و سروشتیدا و د هۆزانێن (خورشید و سۆزانێ)دا، چارچووڤێ عه‌شق و ئه‌ڤینێ بخوه‌ڤه دگرن و هه‌ر چه‌نده هه‌كه فۆرمه‌كێ هۆزانا مللى بخوه‌ڤه بگرن ژى، لێ زێده‌تر به‌ر ب حه‌یرانۆكان ڤه‌دچن. حه‌یرانۆك فكلۆرێ كوردى ب چیرۆك و چیڤانۆك و ستران و گۆتن و پایزۆك و حه‌یرانۆكێن خوه یا زه‌نگیه و هه‌كه ل شێوازێ نڤیسینا ڤان هۆزانان ژى بنێرین، دێ بینین كو ڤان هه‌ردو هۆزانڤانان مفا ژ شێوازێ حه‌یرانۆكان وه‌رگرتینه و هه‌ر چه‌نده د حه‌یرانۆكان دا، خودانێ وێ یێ دیار نینه و دیسا گه‌له‌ك جاران مرۆڤ نه‌شێت بزانیت كا ل سه‌ر زارێ كچێ یان كورى هاتینه نڤیسین، لێ د ڤان هۆزانان دا، هه‌ر دو ره‌گه‌ز ددیارن و هه‌ر چه‌نده هه‌كه دووراتى ژى د ناڤبه‌را واندا هه‌بیت. ئه‌ده‌بێ فه‌یسبۆكى ئه‌رێ ئه‌م دشێین چ ناڤ ل سه‌ر ڤان هۆزانان بدانین؟ هه‌كه ئه‌م ڤێ بكه‌ینه پرسیار و تایبه‌ت ژى، ئه‌و كه‌سێن دووڤچوونا تۆرێن جڤاكى دكه‌ن، دێ زانن كو زێده‌تر توره‌كه بۆ گه‌هاندن و لێكنزیكرنا خه‌لكى پێكڤه و دروستكرنا په‌یوه‌ندیان د ناڤبه‌را واندا، بوویه خه‌لكى گه‌له‌ك رێكار گرتینه به‌ر، كو زێده‌تر كۆنتاكێ ل گه‌ل وان كه‌سان بكه‌ن، یێن ئه‌و ژ خوه و هزرێن خوه نزیك دبینن و دێ بینى، گرۆپێن ئه‌ده‌بى هه‌نه و یێن هونه‌رى و یێن جڤاكێ مه‌ده‌نى و رۆژنامه‌ڤانى و هه‌تا یێن سیاسى و یێن عه‌شیرى ژى. ئه‌ڤه ژبلى ئه‌ڤ كه‌سێن هه‌ولدده‌ن، داهێنانێن خوه ل سه‌ر به‌لاڤ بكه‌ن و كو پرانییا ئه‌ڤێن سه‌ره‌دانا ڤان تۆرێن جڤاكى دكه‌ن، حه‌ز دكه‌ن تشتێن نوو و سه‌رنج راكێش بخوینن و ئه‌ڤ جۆرێ هۆزانێ ژى، بزاڤێن تاكه كه‌سینه ژ پێخه‌مه‌ت بلاڤكرنا داهێنانێن خوه، یان كو مینبه‌ره‌كه بۆ دیاركرنا ئه‌و تشتێ مرۆڤ حه‌زدكه‌ت، خه‌لكێن دى ژى پشكدارى شیانێن خوه بكه‌ت، چ یێن هزرى بن و چ یێن بیروباوه‌ر و چ ده‌نگوباسان ژى، كو تۆرێن جڤاكى دشێت راییا گشتى دروست بكه‌ت. بوویه ب هزرا من ئه‌م زێده‌تر دشێین ڤان جۆره هۆزانان ب ئه‌ده‌بێ فه‌یسبۆكى دانین. نومونه‌كا ئێك ژ هۆزانێن (خورشید ئه‌حمه‌د) و (سۆزان عه‌بدولهادى). (باخچه‌ڤان) خورشید: نـاڤـێ تـه هــناره یـا تــرش و مـزی مــن تـو دیـتی و تـه دلـێ مـن دزی قێرین د سینگیدا بو نه هزار خوزی خـوزی رادهـێلان دل بــۆ ته ده‌رزی هه‌وار ژ هنارا مسافكێ یا گه‌هشتی سۆزان: بــاخچـه‌ڤـانـو تـو وه‌ره خــو كـاركه بچـنه سێڤێت سیـنگی و جان باركه د سورو زه‌رن سێڤ نێ كانی ساركه حه‌شته‌دكه‌م ڤیانا خو بۆ من دیاركه هــه‌ر وه‌كی تـه چـێدكـرن نڤــشـتی خورشید: نــاڤــێ تــه بــیهـا زه‌ره لـۆـپـائـیــزێ خو كه‌هی و بسته‌كه هه‌ی عه‌زیزێ دلــێ مــن كـه‌تـه بـه‌ر خـیزه خیزێ خـو نێزیك كـه هـه‌ی كـاكلكا گـیزێ چـه‌له‌نگێ تو یا خـشكوكو خـشتی سۆزان: چــاڤـێن مـن حـلیكا ره‌شــو ئاله گــه‌رده‌نــا مـن كـانــیه‌كــا زه‌لاله ئه‌زمان گـرتـیه و بــو ته یـێ لاله وه‌ره خـێـفه‌كـه بــو تــه حـه‌لالـه نێ ئه‌زم یا ته ب ئه‌ڤینێ كوشتی خورشید: بــه‌ژنـا تـه یـه هـه‌مـی فـێقی پێڤه ریكێت ته سورن ره‌نگێ وان سێڤه سـینگێ تـه هـرمیـنه دایـنه بـكێـڤه پلوخن لبه‌ر ده‌ستی لێ بكه‌م خێڤه به‌رهه‌مێ باغـێ مـن یـێ گـه‌هشتی سۆزان: بــاخـچــه‌ڤـانـی باغ یێ پێدڤییه جان چاڤدا نـێ ب ئومێدو هیڤییه ده‌ریـایـه‌كـه ژ ڤــیانـێ تـــژیــیه مــالداری لگه‌لـته یــا ژ هـه‌ژییه تو دنیایی تو بۆ من به‌هه‌شــتی
