ل بیرئینانا (44) سالیا پیلانا خیانه‌تكارا جه‌زائیر
ل بیرئینانا (44) سالیا پیلانا خیانه‌تكارا جه‌زائیر
گه‌لێ كورد پیلان شكاند و رۆژ ب رۆژێ ژ ئارمانجێن خوه یێن ستراتیجى نێزیك دبیت
عه‌بدولعه‌زیز محسن بارزانى
مانشیت
(ره‌وشا فیدرالى و ئازادیا مه، به‌رهه‌مێ خوین و خوه و خۆراگریا گه‌لێ كورد و سه‌ركێشا دلسۆزا بارزانیێ نه‌مره)
ل سه‌ر رێكه‌فتنامه‌یا شه‌شى ئادارێ یا سالا (1975) یاكو هاتیه نیاسین ب رێكه‌فتنا جه‌زائیر، ئه‌ڤه(44) سال بوورین. دنێڤبه‌را رژێما ده‌سه‌لاتدارا هه‌رفتى ل عیراقێ و رژێما ئیرانێ یا گۆر به‌گۆر داكو هاتبوو مۆركرن، د په‌راوێزێ كۆنفرانسه‌كێ ئیسلامى دا ل ده‌وله‌تا جه‌زائیر ب پیرۆزباهیا چه‌نده‌ها ده‌وله‌ت و هێزێن مه‌زن، ل ده‌ڤه‌رێ و جیهانێ دژى ئاوات و داخوازیێن ره‌وایێن گه‌لێ كورد، ژلایه‌كێ دیڤه، پێدڤیه بزانین به‌رى به‌ستنا پیلانا جه‌زائیر، كۆمبوونێن سێ قولى د ناڤبه‌را وه‌زیرێن ده‌رڤه یێن هه‌رسێ ده‌وله‌تێن توركیا، عیراقێ و ئیرانێ دا، ل پایته‌ختێ توركیا، باژێرێ ئه‌نقه‌ره دهاتنه گرێدان و ئه‌ڤ كۆمبوونه رێخوشكه‌ر دهێنه هژمارتن، بۆ گرێدانا رێككه‌فتنا شه‌شى ئادارێ (1975)، وه‌سا دیار و خۆیا دبیت رێككه‌فتنا جه‌زائیر ب ئاوایه‌كى هاتبوو دارشتن كو چ ده‌لیڤه نه‌بن گه‌لێ كورد به‌رگریێ نیشا بده‌ت، لێ داگیركه‌رێن كوردستانێ وه‌سا هزر د شۆره‌شا ئیلۆنێ و رابه‌رێ نه‌مرێ گه‌لێ كورد دا دكر كو تووشى شاشیه‌كا مێژوویێ بكه‌ن.
مه‌به‌ستا دوژمنان ژپیلانێ ئه‌و بوو دربه‌كێ كۆژه‌ك و بنبر داوه‌شیننه گه‌لێ كورد و ژلایێ ده‌روونى ڤه و روحا به‌رگریێ ل ده‌ڤ برۆخینن و وێران بكه‌ن. دوژمنان دڤیا ب رێیا هێزا له‌شكرى یا چه‌ند لایه‌ن، كارى قركرنا گه‌لێ كورد ده‌ست پێ بكه‌ن و هه‌تا زه‌مانه‌كێ دوور و درێژ گه‌لێ كورد سه‌رێ خوه بۆ (امر الواقع) بچه‌مینیت و چ حزب و كۆمه‌له و كه‌سێن كورد هه‌تا ئه‌ڤ زه‌مانه مایه، نه بتنێ ل كوردستانا عیراقێ، به‌لكو ل هه‌موو كوردستانێ هزر ل شۆره‌ش و به‌رگریێ نه‌كه‌ن. د ئه‌نجام دا شۆره‌ش ژییاڤه و پێشكه‌فت. رێبازا بارزانى بسه‌ركه‌فت و گه‌لێ كورد په‌رله‌مان و حوكمه‌تا خوه پشتى سه‌رهلدانا پیرۆز ل بهارا (1991) لێ دامه‌زراندن. داگیركه‌ران ژى ژ ئه‌نجامێ پیلانا خوه یا چه‌په‌ل ده‌ه سالن، شه‌رێ ئێك و دو قركرن. پتر ژ ملیۆنه‌كا گه‌نجان كرنه قوربانیێن خیانه‌تا خوه ل گه‌لێ كورد و وه‌لاتێ خوه ژى وێرانكر.
رێككه‌فتنا خیانه‌تكاریا جه‌زائیر ل (6/3/1975)ێ ژى درێژیدانه‌كا مێژووییه بۆ وان خیانه‌تێن ل گه‌لێ كورد هاتینه كرن، چونكو ئه‌ڤێ رێككه‌فتنێ هه‌موو رێك ل به‌ر كوردان گرتن و دربه‌ك بوو ل پشتا كوردان دایى، ژبه‌ر زه‌وقێ هنده‌ك به‌رهه‌م و بیرێن په‌ترۆلێ.
ئارمانجا سه‌ره‌كیا رێككه‌فتنێ نه‌هێلانا شۆره‌شا كوردى ب كریار د ده‌مێ چه‌ند ده‌مژمێران دا، شكه‌ستنا شۆره‌شا ئیلۆنا مه‌زن ل (6/3/1975) دیار بوو، ل وى ده‌مى پیلان یا گه‌رم بوو، كو ئه‌گه‌ر پێشمه‌رگه خوه ب ده‌ست ئیرانێ و عیراقێ ڤه به‌رنه‌ده‌ن، شاهێ گۆربه‌گۆر هێزێ بكاربینت دژى گه‌لێ كورد. رێیا ب ده‌ست پێشمه‌رگه‌یێن شۆره‌شێ مایى، هنده‌ك په‌نابه‌ر چوونه ئیرانێ و هنده‌كا ژى چه‌كێ خوه دانا به‌ر ده‌ستێ حوكمه‌تا عیراقێ.بێگومان ئیمزاكه‌رێن رێككه‌فتناما جه‌زائیرێ وه‌سا هزر كر شۆره‌شا كوردى ب دووماهى هات و ڤێجا چریسكا وێ هه‌لنابیت، لێ هزر و بۆچوونێن وان پتر به‌روڤاژى هاتن. ئه‌وبوو پشتى سال وه‌خته‌كى ب دروستى ل (26 گولانێ 1976) جاره‌كا دى ئاگرێ چریسكا شۆره‌شا كوردى دگۆپیتكێن چیایێن كوردستانێ دا غونى و جاره‌كا دى به‌رده‌وامى ب خه‌باتا خوه یا شۆره‌شگێرانه دا ب ناڤێ (شۆره‌شا گولانێ یا پێشكه‌فتنخواز). پاشى مه هه‌میان دیت چ ب سه‌رێ وان هه‌موو خیانه‌تكاران هات و هه‌ر ئێك ب ده‌رده‌كى چوو، شۆره‌شا ئیلۆنا مه‌زن بوو كارتێكرنا وێ یا نه‌ته‌وه‌یى ژتوخیبێ كوردستانا عیراقێ به‌ر ب هه‌موو پارچێن كوردستانێ ده‌رباز ب بوو و ببوو گه‌فه‌ك ل سه‌ر وه‌لاتێن كوردستانا لێكڤه‌كرى، ل سالا (1980) شه‌ر د نێڤبه‌را عیراقێ و ئیرانێ دا ده‌سپێكر و پاشاى شه‌رێ كه‌نداڤێ دووێ ژى ب دووڤدا هات، ئه‌ڤ رێككه‌فتنا خیانه‌تى هه‌مبه‌رى كوردان بوو ئێك ژ ئه‌گه‌رێن گرنگێن ئالۆزى و نه‌ره‌حه‌تیا ده‌ڤه‌رێ و دێ هه‌روه‌سا مینت هه‌تاكو كورد داخوازیێن خوه یێن عادیلانه بجه بینن، چونكو ئێك ژ ئه‌نجامێن راسته‌وخوه یێن رێككه‌فتنا جه‌زائیر تێكدانا گه‌لێ كورده، له‌ورا راپۆرتا (ئۆپك) پشكا (ج)ماده‌یێ (3) دبێژیت: سیاسه‌تا مه به‌رامبه‌ر كوردان نه یا ئه‌خلاقى بوو، چونكو نه مه هاریكاریا وان كر و نه مه هێلا ئه‌و ئاریشه‌یێن خوه ب دانوستاندنان چاره بكه‌ن، مه پشتا خودایێ، وێ خیانه‌تێ گه‌له‌ك گه‌له‌ك كار ل سه‌ر سه‌نتا سیاسه‌تا ده‌ولى كر و هه‌تا سیاسه‌تا (نه‌ته‌وه‌یێن ئێكگرتى ژى) به‌رامبه‌ر دۆزا گه‌لێ كورد، نه بتنێ ل كوردستانا عیراقێ به‌لكو ل سه‌رانسه‌رى كوردستانێ ئه‌و شۆره‌شا كوردى ژى یا گه‌هشتیه قووناغێن گه‌شدار، ئه‌و ره‌وشا فیدرالى و ئازادیا گه‌لێ كورد نها ل كوردستانا عیراقێ تێدا دبۆریت، هه‌موو به‌رهه‌مێ خوین و خوه و خۆراگرى و قوربانیێن گه‌لێ كورد و سه‌ركێشا دلسۆزانه و كوردپه‌روه‌رانه‌یا بارزانیێ نه‌مره، راسته شكه‌ستنا ئادارا (1975)، شكه‌ستنا وێرانكه‌ر بوو، ژ نشكه‌كێ ڤه و خیانه‌ته‌كا مه‌زن بوویه و ڤه‌ژانا وێ كارتێكرنا خوه ل سه‌ر ده‌روونێ هه‌ر كورده‌كى هه‌بوویه، لێ به‌رامبه‌ر وێ، ده‌نگێ دۆزا كوردى ده‌نگڤه‌دا و مه‌ودایێ خوه به‌رفره‌هتر لێكر، هه‌تا وژدانا ره‌ئیا گشتیا جیهانى ژى ل وى ده‌مى هه‌ژاندى. له‌ورا ژى ئه‌ڤرۆكه د ڤێ بیره‌وه‌ریێ دا، ئه‌م دكارین بێژین گه‌لێ كورد پیلان شكاند و نها یێ به‌ر ب ئارمانجێن خوه یا دایه رێ و به‌ر ب پێشڤه‌دچیت.
ئانكو پشتى پیلانا جه‌زائیر شۆره‌شا گولان نیشتیمانى و پێشكه‌فتنخواز هاته به‌رپاكرن و ل دووڤ دا به‌رى كوردستانى و پاشى سه‌رهلدان و پشتى هنگى هه‌لبژارتن و دروستكرنا په‌رله‌مان و حوكمه‌تێ و په‌سه‌ندكرنا فیدرالیه‌تێ و پێشكه‌فتن و پێشخستنا كوردستانێ و خوشگوزه‌رانیا خه‌لكى و شكاندنا مه‌زنترین گرۆپێ تیرۆرستیێ داعش و ئه‌نجامدانا ریفراندۆما سه‌ربه‌خوه‌یا كوردستانێ و نوكه پلان و ئارمانجێن ستراتیجى هاتینه دانان بۆ راگه‌هاندن و پاراستنا ده‌وله‌تا كوردستانێ و ده‌وله‌تسازیێ داكو نیشا هه‌موو جڤاكێ جیهانێ بهێته‌دان خودانێن پیلانا خیانه‌تكاریا جه‌زائیر گۆربگۆر بوون گه‌لێ كورد و خه‌لكێ كوردستانێ ژى سه‌ركه‌فت، له‌ورا ل دووماهیێ جاره‌كا دى ل (44) سالیا ڤێ پیلانا نێڤده‌وله‌تێ دا دێ بێژین چو جاران نه مه خوه چه‌ماندى یه و نه خوه دچه‌مینین.
