ل بیرا ته تێن
سه‌لمان شێخ مه‌می
هنده‌ك جارا ته خوه سل دكر
په‌رده و په‌نجه‌ر
ڤه‌نه‌دكرن
ته ده‌ستێن خوه
ژ ده‌ستێن من دكێشانه‌ده‌ر
ژێ ڤه‌دكرن
من هزار و ئێك خه‌م
د گاڤێ دا
ل دلێ خوه كۆم دكرن
جاره‌كێ چاڤێ من ل ته بوو
ته بچووكێن جیرانا
ب سینگێ خوه ڤه همبێز دكرن
ته ڕویێن وان
ل به‌ر ماچا و له‌قا
ته سۆردكرن
ئه‌ز دچۆم
هه‌ر ئه‌و بچووكێ
ژ عه‌شقا ته و خه‌ریبیا ته
ژ بێهنا سینگ و به‌رێن ته
جهێ وان ماچێن ته
من ئه‌و بچووك ماچی دكرن
ژ به‌ر تاما ماچێن ته ژێ دهات
من خه‌مێن خوه
ئه‌وێ گاڤێ ژبیر دكرن
٭ ٭ ٭
ل بیرا ته تێن
شه‌ڤبێریه‌كا شه‌ڤێ بوو
ل مالێن جیرانا
مه كوستیرانێ بوو
ب خوه‌دێ
تو ژ به‌ر من هاتی
چایا من ژ ده‌ستێن ته بوو
ژ به‌ر هاتنا ته
گه‌له‌ك جارا ب دزی ڤه
چاڤێ من ل چاڤێن ته بوو
من دزانی تو چه‌ندا خه‌ریبی
هاتنا، ته
ئاگر، به‌ردا من
دل ژ سینگێ من ڤه‌بوو
ئه‌وێ شه‌ڤێ
ل مالێن جیرانا
خوه‌شترین شه‌ڤبێریا مه بوو
٭ ٭ ٭
ل بیرا ته تێن
ئه‌و خه‌ونا من بته‌ڤه دیتی
جیرانا بۆ ته گۆتی
كا من چاوا تو دیتی
تو چۆی و
ته گه‌له‌ك له‌ز كر
مه‌نجه‌له‌كا ئاڤێ
ل سه‌ر كوچكی ته بۆ خوه گه‌رم كر
ژ دله‌كێ تژی ڤیان و خه‌ریبی
ته گه‌رماڤه‌كا خوه‌ش كر
ئه‌و، كراسێ من ژ ته ڤیای
ته ل به‌ر خوه كر
ته خه‌ملا خوه
ژ به‌ر من كر
هندی تو شیای ل به‌ر قودیكێ
بۆ خاترا من
ته پرچا خوه ژ به‌ر من شه‌دكر
ئه‌و ئیشارا من، ژ ته ڤیای
ته ل سه‌ر پرچا خوه گرێدا
ته، خوه ژ به‌ر من
سۆر و زه‌ر كر
ب جوانیا خوه
ته دل خوه‌ش كر
من زانی
ته چه‌ند ئه‌ز دڤیام
چه‌ند حه‌ز ژ من، دكر
٭ ٭ ٭
به‌لێ ئاخ
بۆ من و ته و
ده‌ردێ گران
ته ژبیركرن
هه‌می ئه‌و شه‌ڤ و ژڤان
كا ئه‌و خه‌ریبی و ئه‌و ڤیان
مانێ عه‌مرێ من هه‌می چۆ
تو خه‌ریب نه‌بوویه‌ڤه
لبیرا ته ناهێت
نه چ ماچ، و
نه‌جیران
٭ ٭ ٭
27/8/2021
