ل بەردەرگەهێ شكەفتەكێ ل شێلادزێ دەمژمێرێن بۆمبەكری هاتنە دیتن
ئامێدیێ، مەحمود نهێلی:
هەژمارەكا وەلاتیێن سنۆرێ ناوچەدارییا شێلادزێ دەمێ قەستا ناڤ رەزێن خوە یێن سماقێ كرین، سێ دەمژمێرێن بۆمبەكری دیتن، كو ب مادەیێ تی ئێن تی كری ڤە د گرێدایی بوون.
ئێك ژ وەلاتیان بۆ رۆژناما ئەڤرۆ دیار كر، دەمێ وان قەستا ناڤ رەزێن خوە ل چییایێ كۆرەژاری ل هنداڤی سەنتەرێ ناوچەدارییا شێلادزی كری، سێ دەمژمێر ل بەردەرگەهێ شكەفتەكێ دیتن و گۆت: «پشتی مە خوە نێزیك كری، دیار بوویە وایرەك ژێ هاتیە كێشان و پاشی وەسا بۆ مە دیار بوو، كو ب مادەیێ تی ئێن تی ڤە د گرێدایی بووینە، مە لایەنێن پەیوەندیدار ل سەر بوویەرێ ئاگەهداركرینە».
ناڤهاتی داخواز ژ خەلكێ دەڤەرێ ژی كر، دەمێ قەستا چیایی دكەن یان دچنە د ناڤ رەزێن خوە دا گەلەك دهشیار بن و ئاگەهداربن ل سەر ڤان رەنگە بابەتان و هەبوونا پاشمایێن شەری و پارچەیێن بۆمبەیان و كەرەستەیێن تی ئێن تی كری، چونكی زۆر جاران ئەڤ جۆرە پاشامایە بووینە مەترسی ل سەر ژیانا وەلاتیان و گیان ژ دەست دان و پەككەڤتنا خەلكی.
