ل بەر تاڤەزەرکا مرنێ
شەمال ئاکرەیی
باژێر وەکو دەمژمێرەکا ژەنگگرتی
ل ناڤ تەقنا شەڤێ دا دخەندقی.
جاددە ب ددانێن خۆ یێن شکەستی،
بێدەنگیێ ڤەدجوی.
ئەم ل کۆلانێن دوهی
بێ هەلویست ماین.
ل دەراڤێن بەختێ شێلی..
باوەریا زوها..
خۆلی ب سەرێ مە وەرکر .
ژ هەستێن بەریا دیتنا تە..
من ملەکێ هزران چنی.
ڤێ پاییزا زوی هاتی و
ب نەخافلەتی ب سەر مە دا گرتی،
هلما هەناسەیێن مە سار کر.
بیرهاتنێن مە
وەکو بەلاتینکێن پەڕ شکەستی
ل سەر شویشەیێن تەمێ گرتی دادان.
نەخشەیێ رێیا ژ مە وندا
ل بەر سیبەرەکا وەریایی یا خوداڤەندێ بەختی
بێ مەی ئەم مەستکرین .
ئەڤ دویکێلا ژ خۆدیکێن ئەم تێڕا مژدار
بلند دبیت
پەیڤان وەکو فڕندەیێن سەرژێکری
د ناڤ لەپێن مە دا ب سەما دئێخن.
ژ وێ رۆژا ئاگر نەمای هێمایێ مە
پەیکەرەک ژ وی ئاڤاهیێ مشت پەیکەر
بوو ئاهۆرایێ مە،
ئێدی نەما رۆناهی ژ رۆژێ بزێت،
بەلکو ژ برینێن ستێرەیان.
هەر ژ دەمێ..
ل بەر وان هەشت دەرگەهان
ئەم بووینە کویلە،
تاری سەرکێشیا کاروانێ مە یێ بێهۆش دکەت.
ل بەر تاڤەزەرکا مرنێ
ب بوهایێ فنجانەکا قاوەیێ،
مانا خۆ دپیڤین
د ناڤ بێدەنگیا گەردوونی دا،
گەنگەشەیا هەبوون و نەبوونا خۆ..
گەرم دکەین.
