ل بەر دلێ وی سار بووم
ئەڤرۆ نیوز:
کچەکا 24 سالی کو دەرچویا زانکویێ یە دلێ خوە بۆ ئەڤرۆ ڤەدکەت و دبێژیت: من ھەڤالەک ھەیە دەرچویێ زانکویێ یە، ژیێ وی 25 سالە ئەز و ئەو بو ماوەیەکێ درێژ بوینە ھەڤال لگەل ئێکدو ل زانکویێ کوڕەکێ خودان رەوشتە ئەو یێ چاوایە ئەز ژی وەکی وی خودان رەوشتم پشتی بورینا دەمی من باش نیاسی دلێ من گەلەک کەفتە رەوشتێ وی و مالا من ژی گەلەک پێ د رازی بون و بو من وەسا دیار بو کو ئەوی ژی ھەمان ھەستێت بەرامبەری من ھەین، ھەرچەندە ئەز یا ژ ڤێ ھزرێ دوور ژی بوم لێ ب مخابنی ڤە من نەشیا خوە روژەکێ من گوتێ تو کورەکێ خودان رەوشتی من دڤێت شوو ب تە بکەم وی گوتە من دێ ھزرێت خوە کەم و بێژمە مالا خوە پشتی سێ روژان گوتە من لمن ببورە خودێ حەز نەکر بو ئێک بین و ھەتا نھا ژی بو من دیار نەکریە کا ئەگەر چو بو بتنێ دبێژیتە من ئەڤ تشتە یێ ب من و مالا منڤە گرێدایە و ھیچ پەیوەندی بتەڤە نینە، لێ ئەز وەسا ھزر دکەم کو پشتی من ڤیانا خوە بو وی دیار کری ئەزا لبەر دلێ وی سار بویم بو زانین خەلک گەلەک من دخوازن لێ ھەتا نھا ژبەر وی نەشیایمە شوو بکەم بتنێ ھزرێت وی دکەم و نەشێم ژبیر بکەم و بەرامبەری وی شەرم ژ خوە دکەم ئەڤجا ھوون چو دبێژن و ئەز چو بکەم؟
کچا ھێژا :
ھەر جڤاکەک ھندەک رەوشت و تیتالا بخوە ددانیت و دبنە یاسا و گەلەک جارا ژ یاسا بھێزترن لسەر خەلکی و پێگیری کرن پێ ئێک تایە و کارتێکرنا وان لسەر کەسان دکەفتە د لایێ بێ ھەستی دا (دلاشعوری ) دا و ھەر کارەکێ لدووڤ وان نەبیت جھێ نەرەزامەندیێ یە و ناھێتە قەبوولکرن نەخاسمە لدەف کەسێن دیتنێن بەرتەنگ ئەڤجا وەسا دیارە کو داخوازا وێ چەندێ بکەی دبیت لدەف وان کارەکێ نەیێ یاسایە و مخابن شروڤەکرنێن جودا د دووڤدا دھێن، باشە کور دڤان بابەتان دا بیرو رایێن خێزانا خوە وەربگریت و گوھداریا وان بکەت، بەلێ دڤێت بزانیت کو بابەتەکێ گرێدایە ب وی ڤە و ژیانا وی و دڤێت یێ سەربخو بیت و بریار یا وی بیت بەلێ مخابن گەنجێ مە ناھێتە پەروەردەکرن لسەر ڤان بنەمایا و لاوازی یا دیارە لسەر بریارێن گەلەک گەنجێن مە ئەڤجا یا دیارە کو یان یێ لاوازە یان ژی ھزرەکا دی یا ھەی. بدیتنا مە باشترە بمینی وەک برادەر و ھەڤال و ئەگەر بو تە نەسیبەک چێبو و لدووڤ وێنێ تە بخو چێکری و خودان رەوشتێ باش بیت وێ سەربورێ ژبیر بکە و بریارا شووکرنێ وەربگرە .