ل بەغدا تایكواندۆیا تەناهی نوونەرا پارێزگەهێ یە
چاڤەڕێ یە ل ئەینییا بهێت تیما تایكواندۆیا یانەیا تەناهی وەكو نوونەرا ئێكانە یا پارێزگەها دهۆكێ پشكداری مەزنترین قارەمانییا ئیراقێ بیت، ئەوا دێ ل باژێرێ بەغدا ب پشكدارییا زیدەتری 100 یانەیان هێتە كرن.
وەهبی مەهدی راهێنەرێ تیما تەناهی بۆ رۆژنامەیا ئەڤرۆ گۆت: ب پێنج یاریزانێن كوڕ و پێنج یێن كچ دێ پشكداری قارەمانیا ئیراقێ بین ئێك ژ بهێزترین و مەزنترین قارەمانیێن وەرزێ ئەڤ سالە ل سەر ئاستێ پێشكەفتیان بین، هەرچەندە ئاریشەیا نەبوونا پشتەڤانییا دارایی گڤاشتن ل سەر تیمێ كرینە و مە داخواز ژ یاریزان كرینە هەڤكارێن مە بن، لێ وەكو بەرهەڤی رژد بووینە و ئەڤە دو هەیڤە بەردەوامین، بۆ وێ یەكێ باشترین ئاست و ئەنجام وەكو نوونەرێن پارێزگەهێ و یانەكا كوردستانی بشێن هەڤڕكیێ بۆ رێزێن ئێكێ بكەین، دبیت ئەركێ مە ب سانەهی نەبیت لێ ب هیڤی نە ئەوا دشیان دا یاریزانێن مە پێشكێش بكەن و جهێ خوە د ناڤ رێزێن هەلبژارتیێ ئیراقێ بكەن بۆ قارەمانێن دەرڤە.
