ل بەغدا هەولێر دێ بزاڤێ كەت دەربازبیتە یارییا دووماهیێ
قەیس وەیس:
چاڤەڕێ دهێتە كرن ئەڤرۆ ل دەمژمێر هەشتی شەڤ تیما یانەیا هەولێر ل یاریگەها شەعب یا نێڤدەولەتی ل باژێرێ بەغدا ببیتە مێڤانا یانەیا حدود ژ چارچووڤێ هەڤڕكیێن قۆناغا پێش دووماهییا قارەمانیا كۆپا ئیراقێ یا تەپا پێی و دێ بزاڤێ كەت ب ڕێیا مێڤانا خوە دەربابیتە یارییا دووماهیێ، سوبەهی یارییا دویێ ژ هەمان قۆناغ دناڤبەرا جەوییە و كەرخ هێتە كرن.
ئارمانجا نوونەرا كوردستانێ ناسناڤێ ئێكێ یە
تیما هەولێر ل سەر كیستێ تیما بەحری دەربازبوو ڤێ قۆناغێ پشتی خوەڤەكێشانا یانەیا بەحری، بەرانبەر دا یانەیا حدود ب لێدانێن پەنەلتیان شیابوو سەركەفتنێ ل سەر نەفت ئەلمیسان بینت و دەربازبیتە قۆناغا پێش دووماهیێ، كوڕێن قەلا ومنارە وەكو نوونەرا كوردستانێ گەشبینن د یارییا ئەڤرۆ دا سەركەفتنێ بینن و دەربازبینە یارییا دووماهیێ و ئارمانجا وان ژی ناسناڤێ ئێكێ یە، د دیدارێن وەرزێن بۆری یێن هەردو یانەیان 14 جاران بەرانبەری ئێك بووینە، حەفت سەركەفتن بۆ هەولێر، ئێك بۆ حدود و شەش وەكهەڤی بووینە.
بۆ زانین تیما یانەیا دهۆكێ گەهشتبوو قۆناغا 16ێ ژ كۆپا ئیراقێ ئەوا یانەیا تەلەبە شیایی ب گۆلەكێ سەركەفتنێ بینت و هیڤیێن دهۆكێ ب راوەستینیت، هەردو یانەیێن دی یێن كوردستانی زاخۆ و نەورۆز هەتا قۆناغا 32ێ هاتبوون، زاخۆ دگەل زەورا ب گۆلەكێ و نەورۆز دگەل نەفت میسان تووشی خوسارەتیێ بوون، د دیرۆكا قارەمانیێ دا یانەیا زەورا پێنچ ناسناڤ دەستڤە ئیناینە، هەر ئێك ژ جەوییە و تەلەبە دو جارا ناسناڤ ئیناینە و كەرخ جارەكێ دەستڤە ئینایە.
