ل تاخەکێ زاخۆ ئاڤ و گاز تێکەل بووینە !
ئەڤرۆ نیوز، عەلی حاجی:
زێدەتری ١٠ روژایە ئاڤا تاخێ ئازادی ل زاخۆ یا بەرنیاس ب تاخێ ( جوھیا ) پیس بوویە و ل گورەی ئاخفتنا خەلکێ وی تاخی گاز دگەل ئاڤا سەرەکیا وی تاخی تێکەل بوویە و ب کێر ڤەخارنێ و ھەتا شیشتنا ئامانا ژی ناھێت.
مێھڤان عەبدی ، ئێک ژ ھاولاتیێن وی تاخی یە بۆ ئەڤرۆ نیوز دیارکر زێدەتری ١٠ روژایە ئاڤا سەرەکی یا تاخێ مە گاز دگەل دایە و بێھنەکا نەخوەش یا گازێ ژێ دھێت و ب کێر ڤەخارنێ ناھێت و ئەم نەشێن کارێ خوەیێ روژانە بکەین ژ بەر پیس بوونا وێ ، نوکە ئەم نەچار بووینە ئاڤێ بکرین داکو بشێین ڤەخوین و ئەڤ چەندە ژی دبیتە بارگرانی بۆ گەلەک ھاولاتیێن ڤی تاخی ژبەر کو دشیانێن وان دا نینە روژانە ئاڤا ڤەخارنێ بکرن.
ل دۆر ڤێ ئاریشێ ھاشم بوسەلی ، رێڤەبەرێ ئاڤا زاخۆ بۆ ئەڤرۆ نیوز گۆت: ئەم ئاگەھدارین ل سەر کێشەیا وی تاخی ھەتا سوباھی روژا دوشەمبێ دێ تیمێن مە قەستا وی تاخی کەن دا کو وێ ئاریشەیێ چارەسەر بکەن ، بەری ماوەیەکی تاخەکێ نێزیک وی تاخی ھەمان کێشە ھەبوو ژبەرکو بوریێن ئاڤێن وان تاخان کەڤنن و دشکێن ژبەر ڤێ چەندێ ئاڤا وان تاخان پیس دبیت .
