ل حه‌فتیا بهێت بڕیار ل سه‌ر ناوچه‌داریا شاریا دێ هێته‌دان
دهۆك، له‌زگین جوقی:
نوونه‌را ئێزدیان ل جڤاتا پارێزگه‌ها دهۆكێ دیار كر، ل حه‌فتیا بهێت جڤاتا پارێزگه‌ها دهۆكێ دێ بڕیارێ ده‌ت كو كۆمه‌لگه‌ها شاریا ببیته ناوچه‌داری.
بێریڤان سه‌لیم شه‌مۆ، نوونه‌را ئێزدیان ل جڤاتا پارێزگه‌ها دهۆكێ بۆ رۆژناما ئه‌ڤرۆ دیار كر كو مه‌سرور بارزانی، سه‌رۆكێ حوكمه‌تا هه‌رێما كوردستانێ بڕیار دایه كو بڕیارا ناوچه‌داریا خانكێ بكه‌ڤیته د وارێ بجهئینانێ دا و گۆت: “به‌ری چه‌ند سالان جڤاتا پارێزگه‌ها دهۆكێ بڕیار دابوو كو كۆمه‌لگه‌ها خانكێ ببیته ناوچه‌داری و نوكه ئه‌و بڕیاره دێ بجه هێت”.
بێریڤانێ گۆتژی: “بڕیاره ل حه‌فتیا بهێت جڤاتا پارێزگه‌ها دهۆكێ بڕیارێ بده‌ت كو كۆمه‌لگه‌ها شاریا ژی ببیته ناوچه‌داری و ئه‌ڤ هه‌ردو كۆمه‌لگه‌هێن ئێزدیان دێ بنه ناوچه‌داری”.
بیریڤان سه‌لیم شه‌مۆ، ئاماژه دا وێ چه‌ندی ژی كو ل سالا 2016ێ بڕیار ژلایێ جڤاتا پارێزگه‌ها دهۆكێ ڤه ل سه‌ر ناوچه‌داریا خانكێ هاتبوودان، هه‌ر د وی ده‌می دا نڤیسار بۆ پارێزگارێ دهۆكێ هاته بلندكرن ب رێیا پارێزگارێ دهۆكێ ژی بۆ وه‌زاره‌تا ناڤخوه هاته بلندكرن، لێ ژ ئه‌گه‌رێ قه‌یرانا دارایی و شه‌ڕێ تیرۆرستێن داعشێ بۆ سه‌ر هه‌رێما كوردستانێ، نڤیسار هاته گیرۆكرن و گۆت: “نوكه پشتی ره‌وش باش بوویی و قه‌یرانا دارایی نه‌مای، جاره‌كا دی كار ل سه‌ر هندێ دهێته كرن كو كۆمه‌لگه‌ها شاریا ببیته ناوچه‌داری و بڕیارا كو كۆمه‌لگه‌ها خانكێ ژی ببیته ناوچه‌داری بكه‌ڤیته د وارێ بجهئینانێ دا، داكو باشتر خزمه‌تا خه‌لكێ هه‌ردو كۆمه‌لگه‌هێن خانكێ و شاریا بهێته كرن”.
گۆتژی: “سه‌رۆكێ حوكمه‌تا هه‌رێما كوردستانێ ل سه‌ر بابه‌تێ هه‌ردو كۆمه‌لگه‌هێن خانكێ و شاریا كو ببنه ناوچه‌داری كار دكه‌ت، دیسا بڕیار ژی دایه بریارا ناوچه‌داریا خانكێ بجه بهێت و له‌ز د ڤی بابه‌تی دا بهێته كرن، هه‌موو به‌رهه‌ڤی هاتینه كرن و رێكارێن ئیداری هاتینه وه‌رگرتن ل سه‌ر ڤی بابه‌تی، ل حه‌فیتا بهێت بڕیار ل سه‌ر كۆمه‌لگه‌ها شاریا دێ هێته دان كو ببیته ناوچه‌داری”.
