ل دادگەهێ پرسیار ژمن كر تو كریستیانی؟ من گۆت: نەخێر ئەز كوردم
دیدار: رەمەزان دەشتمری/ زاخۆ
2-4
ئەوبی ل ڕۆژا 7/11/1974ی هێرشەكا زور مەزن یا ئەسكەرێ حكومەتا ئیراقێ ب هەمی ئەوی چەكێ ل بەردەست و دگەل فڕوكەیێن جەنگی بۆ دەڤەرا سەرتیزی و پلنگانی ئینان و پشتی شەرەكی ئێكجار دژوار ئەز ب گرانی بریندار بووم و دەستێ من یێ ڕاستێ هات شكتاندن و پەڕتاندن و من دەستێ خۆە ژ دەستدا. هەڤالان ئەز بۆ پشتێ ڤەگوهاستم ل ئەوی دەمی دكتور فەرهاد نوشدارێ شۆرشێ بوو هەر ئێكسەر برینا دەستێ من دەرمان كر، و ئەز بۆ نەخوشخانا باژێڕێ خانی هاتم ڤەگوهاستن. بۆ دەمێ حەفت ڕۆژان ئەز ل نەخوشخانا باژێڕێ خانی دا مام. ل ئەوێ نەخوشخانێ فەرماندە سەید عەبوش سلێڤانەیی ئەو ژی ل ئەوێ ژورێ بوو یا ئەز تێدا نڤاندیم. بەلێ ئەو بەری من ب هەشت ڕۆژان ل ئەوی بەروكی ل سەرتیزی بریندار ب بوو ئەم هەردوو ژ ئێك ژورا نەخوشخانێ دا بووین. ل ئەوی دەمی بۆ مە گەلەك نەخوشبی و ئەم ب تنێ ل نەخوشخانێ و بێ كەس كار و یێ ئێك مە ناس بكەت، و یان بێت بۆ سەرەدانا مە هەكەر مە پێدڤی ب تشتەكێ ژی هەبا كەسی وەسا نەبی بۆ مە ب جهبینت و هەر وەسا ئەو نوشدارێن چارەسەریا مە كرن، ڕەكەز فارس بوون بەلێ ب تنێ مەكتەبا سیاسی یا پارتی دیموكراتی كوردستان گەلەك هاریكاری و چاڤدێریا مەدكرن. پشتی بورینا هەشت ڕۆژان ل نەخوشخانا باژێڕێ خانێ بڕیار هات دان فەرماندە سەید عەبوش بۆ نەخوشخانا باژێرێ تەبرێز بێت ڤەگوهاستن و ئەز بۆ نەخوشخانا شێرو خورشید یا باژێرێ مهاباد بێم ڤەگوهاستن، بۆ ماوێ سێ هەیڤان ئەز د نەخوشانا شێرو خورشید ل مهادێ دا مام نڤاندی و بێ كەس و كار و من چ ژ ڕەوشا مالێ نزانی كا ئەو ب چ سەرچوون و كا ئەو دزانن ئەزی ساخم یان ئەزی مریمە و گەلەك جاران من بۆ حالێ خوە دكرە گری و ڕوندك ب باراندن، دەمێ نەكسە ب سەر شۆڕشا ئیلۆنێ دا هاتی و پێشمەرگەیی بەروكێن شەری ڤالە كرین و خەلكێ خۆە رادەستی حكومەتا ئیراقێ كرن و خەلكەكی زور ژی قەستا ڕۆژهەلاتا كوردستانێ كرن. ل دەمەكێ من بەرێ خۆە دایێ پسمامێ من ب ناڤێ ئیشو بالیو زكو ل ئەوی دەمی شوفێرێ ترومبێلا كاك سامی شنگاری بی و هات بۆ سەرەدانا من ل نەخوشخانێ و پشتی مە ئێك و دوو دیتی گەلەك كەیفا من هات و من پسمامێ خۆە ل نەخوشخانێ دیتی. پسمامێ من ئیشو بالیوز گوتەمن پسمام ئەڤە نەكسە ب شوڕەشێ كەت و سەركردایەتیا شۆڕشێ و مەكتەبا سیاسی یا پارتی یێن ل تەنشتا باژێرێ نەغەدێ ل بن خیڤەت و چادران دا بنەجه بوین. ڤێجا وەرە ئەم دێ بۆ مەكتەبا سیاسی چین و بابەتێ برینداری و رەوشا خۆە بۆ ئەوان دیار بكە، كا دێ ئەو چ بڕیارێ ل سەر داخوازیێن تە دەن. من گۆتە نوشدارێن نەخوشخانێ ئەز دێ نەخوشخامێ دەركەڤم. بەلێ نوشداران گوتەمن: ناچێبیت تو ژ نەخوشخانێ ب دەركەڤی و هێشتا پارچەك ساچمەیی یا ددەستێ تەدا مایێ و برینا دەستێ تە ساخ نەبویە، و دڤێت بۆ دەمەكێ دیتر ل نەخوشخانێ بمینی هەتا برینا لاشێ تە ب دروستاهی ساخ ببت، و رەوشا ساخلەمیا تە بنەجه ببیت و ل ئەوی دەمی تو دشێ ژ نەخوشخانێ دەركەڤی و قەستا مالا خۆە بكەی. ئەو بی بیێ بریارا نوشداران ئەز ژ نەخوشخانێ دەركەوفتم و ئەز پسمامێ خۆە بۆ یارەگایێ مەكتەبا سیاسی یا پارتی دیموكراتی كوردستان ل یاژێڕێ نەغەدێ هاتین. ل باژیرێ نەغەدێ من سێ داخوازنامە نڤیسن ئێك دەستێ كاك سامی شنگاری كول ئەوی دەمێ وەزیرێ نشتەجیبونێ بی و داخوازنامەیا دووێ من بۆ دەستێ مەكتەب عەسكەری نڤیسی. داخوازنامەیا سیێ من بۆ دەستێ بارەگایێ یارزانی نڤیسی و من رادجەستی ئەوان كرن. هەلبەت ل ئەوی دەمی ئەو بۆ ماوێ پێنج هەیڤان بی من موچەیێن خۆە پێشمەرگایەتیێ وەرنەگرتبین. ئەو بوو مەكتەب عەسكەری ئەو هەر پێنج موچەەیێن من دانە من هینگێ موچەیێ من یێ هەیڤانە مەبلەغێ بیست و دوو دینار و نیڤ بین هەمی من ل سەر ئێك وەرگرتن. هەر وەسا مەكتەبا سیاسی یا پارتی دیموكراتی كوردستان و كاك سامی شنگالی هەر ئێكی مەبلەغێ بیست هزار دیناران وەك هاریكاری دانە من. پشتی بورینا حەفتیەكێ گوتن ئەوی خەلكێ ئاوارەبویی وەرن كومڤەببن دێ جەنابێ كاك ئیدریس بارزانی گوتارەكێ پێشكێشی هەوە كەت. پتر ژ دوو یا چوار هزار مروڤان ل ئەوێ گورەپانێ كومبین و جەنابێ كاك ئیدریس بارزانی هات و چوو سەر برمیلەكا ڤالە یا گازی دا ئەوی خەلكێ هەمیێ ببینت و ئاخفت و گوت: خەلكێ مەیێ خوشتڤی ئەوێ نە دگەل خێزان و زاروكێن خۆە بت و هەر وەسا ئەوێ حەز ل سەر ئەوێ چەندێ هەبت بۆ ناڤ مال و مروڤێن خۆە بچت ڕێك بۆ ڤەكریە و سوپاسیا وان دكەین بلا ڤەگەرن بەس هیڤیدارین بۆ مللەتێ خۆە نەبنە دەرزی و ئاستەنگان پەیدا بكەن. هەر وەسا ئەوێ ل ڤێرێ بمینت ژی ژیانا مە یا پێكڤەیە و بۆ مان و نەمانێ دێ دگەل ئێك بین. ئەوبی ئەم حەفت پێشمەرگەیێن پەككەوتوو مە بریا ردا دگەل ئێك بۆ دەڤەرێ بێن و خۆە ڕادەستێ حكومەتا ئیراقێ بكەین. سەركردابەتیا شۆڕەشێ ترومبێلەك ژ جورێ پیكەم ئینان ئەم لێ سیاربین و بۆ سنوری هاتین هەتا گەهشتین خالا حاجی عومران و گوتنە مە: ئەم هەتتا ڤێرێ دشێن دگەل هەوە بێن ئەوا ل بەراهیكا هەوە فەوجا ئەسكەرێ حكومەتا ئیراقێ یە و هەڕن قەست ب كەنێ و هوین ل سنورێ دەولەتا ئیرانێ خلاس و دێ دەربازی بۆ ناف ئاخا ئیراقێ بین. دەمێ ئەم بۆ بارەگایێ فەوجا ئەسكەری هاتین و ئەسكەر هاتن بەراهیكا مە و گوتن: ئەڤە عوسات هاتن و نەشیا باخڤین و پاشی هندەك قەسێن نەخوەش ژی گوتنە مە و مەژی گوتە وان: ئەڤە حكومەتا ئیراقێ لێبورین یا دایی و ژبەر ئەڤێ لێبورینێ مە یا خوە رادەستی حكومەتێ كری. ئەوبی ترومبێلەكا ژ جورێ پاس یا هەژدە نەفەری بۆمە ئینان و ئەم لێ سیاركرن و ئەسكەر ژە دانە دگەل مە و هەر ئێكسەر ئەم بۆ بارەگایێ (ئەمنا عام) ل باژێرێ هەلێرێ ئینان و ڕادەستی ئاسایشا گشتی كرن. ل ویرێ هەر ئێك ژمە دوازدە وێن بۆ گرتن و ب شەق و بێهنا ئەم قوتایبن و گوتن مە: (گەواوید) هەر ئێك ژهەوە چەند ئەسكەر كوشتینە؟ ژبەر كو ئەم هەمی بریندارێن بەروكێن شەڕی بین و گەلەك قەسێن كرێن و نە ڕەوا دگوتن مە و ئەم ژی وەك كەسێن ئێخسیر دناڤ دەستێن ئەواندا بێ دەنگ مابین.
