ل داستانا كانیماسـێ فرۆكەیێن دوژمنی هەڤژین و دو زارۆكێن من شەهیدكرن
دیدار، سالار محەمەد دۆسكی:
1 – 5
پێشمەرگە و مامۆستایێ شۆڕەشا گولانا پێشكەفتنخواز (عەبدولكەریم حسێن حەسەن) ل سالا 1/7/1955 گوندێ دێریشكێ ل دەڤەرا بەرواری بالا ل ناحیا كانی ماسێ ژ دایك بوویە، پشتی خواندنا خوە تەمامكری وەك مامۆستا هاتە دامەزراندن و دووف دا قەستا ناڤ رێزێن شورەشێ دكەت و ل داستانا كانی ماسێ فرۆكێن دوژمنی پشتی مالا وی توب باران دكەن هەڤژین ل گەل دو زارۆكێن وی شەهید دبن و دو زارۆكێن دی بریندار دكەڤن.
پێشمەرگە و مامۆستایێ شۆڕەشا گولانا پێشكەفتنخواز (عەبدولكەریم حسێن حەسەن دێریشكێ) زێدەتر بۆ رۆژناما ئەڤرۆ گۆت: مالا مە بناڤێ بنەمالا عەبێ یا بەرنیاس بوویە ل دەڤەرێ من پێنچ مام هەبوون و پشتی بابێ من وەغەركری مامێ من ئەز خودانكرم و پشتی شورەشا ئیلونا مەزن ل سالا 1961 ئەم دەربەدەربووینە و چووینە باژێرێ مویسل و خواندنا خوە یا سەرەتایی و ناڤنجی ل وی باژێری من ب دووماهی ئینا، ل سالا خواندنێ 1973- 1974 ل خانا مامۆستان ل باژێرێ دهۆكێ هاتمە وەرگرتن، پشتی تێكچوونا كاودانێن سیاسی ل سالا 1974 ئەم رەڤین چووینە ناحیا سەرسنگ وی دەمی ئەم سەر ب ئێكەتیا قوتابیێن كوردستانێ بووین وی دەمی گەلەك دیفچوون ل سەر ئێكەتیا قوتابیێن كوردستانێ هەبوو و ل سەرسنگێ مە بەردەوامی دا خواندنا خوە و دوڤدا وێ سالێ ل قەلادزێ زانكۆیا سلێمانیێ هاتە توبارانكرن، خودێ ژێ رازی (مەلا مستەفا بارزانی) بریاردا قوتابخانە بهێنە راسوتاندن و قوتابی ڤەگەرنە ناڤ مال و كەس و كارێن خوە و نەچاربووم چوومە گوندێ خوە دێریشكێ، و هەتا ئادارا سالا 1975ێ و شۆڕەش تێكچووی و نسكۆیا سالا 1975 دروست بووی مە خوە رادەستی حوكمەتێ كر پشتی لێبورین هاتیەدەركرن، مە دەست ب خواندنا خوە كر و ئەو سالا مە ل سەر سنگێ خواندی بوومە نەهاتە هژمارتن و دووبارە ڤەگەراندینە قوناغا ئێكێ و بەردوام بووین هەتا سالا 1977 مە خواندنا خوە ل خانا مامۆستان ب دووماهی ئینای وی دەمی سەركەفتیێ ئێكێ بووم و ئەم 700 قوتابی بووین، ل سالێن 1973- 1974 خانا مامۆستان ل دهۆك هاتبوو ڤەكرن وی دەمی ئاڤاهیێ تێدا دەوام دكر ل گەل ئامادەیا كاوە بوو، كچ ل ئامادەیا دهۆك بوون و دوڤدا چوونە ئاڤاهیەكی نێزیك فلكا مەم و زین و پشتی من ب دووماهی ئینای هاتمە دامەزراندن وێ سالێ ئێكسەر من خوە ل كانی ماسێ دامەزراندن و هەر وێ لژنا چاف پێكەفتن ل گەل من كری دیاركر، كو سەركەفتیێ ئێكێ مە و مە كورسیێن زانكۆیێ هەنە و خواست بچمە زانكۆیێ بەردەوامیێ بدەمە خواندنا خوە، خواستا من ل سەر كانی ماسێ ئەو بوویە چونكە مالا مە ل وی جهی بوو و دیسا پێشتر ژی هێشتا قوتابی ئەز وانەبێژ بووم ل ناڤنجی یا كانی ماسێ و رێڤەبەرێ قوتابخانێ مامۆستا(زەیە) خودێ ژێ رازی بیت گەلەك خوش مرۆف بوو، و خواست بچمە ناڤنجی یا كانی ماسێ وەك وانەبێژ و هەمان دەم ل قوناغا سەرەتایی ژی وانێن خوە بێژم وەك دامەزراندی و چوومە كانی ماسێ من سپێدێ دەوام ناڤنجیێ دكر و ئێڤاری مە ل سەرەتایی دكر وەك دامەزراندنی وی دەمی هەر وانەكا مە گۆتبا ل ناڤنجیێ بەرامبەر (14) دەرهەمان بوو وی دەمی ئەف پارە گەلەك بوو و دەمێ سال ب دووماهی دهات پارە دهاتەدان وێ سالێ من بابەتێن بیركاری، زمانێ عەرەبی، گۆتن و خەلكێ هەمی گوندێن دەردوری كانی ماسێ دهاتنە دەف مە وی دەمی مە (9) پولێن قوناغا ئێكێ ناڤنجی كو نوكە دبێژنێ(7) مە هەبوون و پتر ژ (1000) قوتابیان ل ناڤنجیا كانی ماسێ مەهەبوون و تاكە ناڤنجی بوو دناڤا دەڤەرا بەرواری یا دا و گەلەك قەرەبالغ پولان هەبوو، و بیرا من دهێت چەند قوتابی ل دووماهیێ شپێرە راوستیان چونكە جه نەبوو ل سەر روونە خوار وی دەمی ناڤنجی یا تێكەل بوو بەلێ رێژ كچان كێمتر بوو ژ یا كوران، وی دەمی قوتابخانێن خواندنا بلەز و نەهێلانا نە خوێندەواریێ بۆ مەزنان هاتنەڤەكرن و مە دەست ب خواندنێ كر و مە وانە گۆتنە مەزنان ژی وەك دەواما سیێ و سالەك من كانی ماسێ دەربازكر.
